Pathianni-ah hri kai 281 hmuh belh leh an ni

Pathianni khan Mizoram-ah Sample 1388 enfiah niin heng atang hian COVID-19 hri kai mi 281 hmuhchhuah an ni a, Sample enfiah atanga za zela 20.24 te chuan hri an kai a ni.

Pathianni khan ZMC-a RT-PCR Laboratory-ah Sample enfiah awm lovin District hrang hranga TrueNat Laboratory-ah Sample 27 enfiah a ni a, heng atang hian hri kai mi 3 hmuh niin Mamit District chhung ami vek an ni.

Pathianni khan Rapid Antigen Test hmangin Sample 1361 enfiah ni bawkin heng atang hian hri kai mi 278 hmuhchhuah an ni a, an zinga mi 196 te chu Aizawl District atanga hri kai hmuhchhuah te niin Veng mal-a hri kai hmuhchhuah tamna ber Zarkawt-ah hri kai mi 23 hmuh an ni a, hei bakah hian hri kai mi 10 aia tam hmuhna Veng 4 a awm bawk. Kolasib District-ah pawh hri kai mi 29 hmuh niin Lunglei District-ah 27, Lawngtlai District-ah 19, Mamit District-ah 5 leh Champhai District-ah hri kai mi 2 hmuh an ni bawk.

Heti hian nimin thlenga Mizoram-a COVID-19 hri kai hmuh tawh chu 44,520 niin nimin khan tlai dar 5:00 thlengin mi 419 te chu hri lakah fihlimin anmahni enkawlna hmun atanga chhuahtir leh an ni a. Heti hian nimin tlai dar 5:00 thlenga Mizoram-a hri kai enkawl dam chu 32,625 niin hei hi hri kai hmuhchhuah atangin zaa  73.28 a ni a, tunah hian hri kai enkawllai 11,727 an la awm mek a ni. Nimin khan Mizoram-a COVID-19 hri kai zingah mi pakhat boral lehin Mizoram-a hri kai zingah mi 168 an boral tawh. Nimin zing dar 4:00 khan PC. Lalzamliana (59), Aizawl Venglai chu COVID-19 vangin ZMC-ah a boral leh a ni.