Chanchin thar thenkhat :

Sawrkar in Committee din

Mizoram sawrkar Health & Family Welfare Department chuan Lunglei Civil Hospital-a RT-PCR Laboratory din dan ngaihtuahtu tur Committee a din a, he Committe-ah hian Health & Family Welfare Department-a Principal Director chu Chairman niin Director, Hospital & Medical Education chu Member Secretary a ni a, Member atan Civil Hospital Lunglei-a DMS bakah YMA Sub-Hqrs. Lunglei-a President leh Lunglei Thalai Pawl-a Chief Organizer te ruat an ni. He Committee hi ni 7 chhunga Lunglei Tourist Lodge leh Building dang remchang awm thei te tlawha RT-PCR Laboratory bunna tur building peihfel a nih hmaa khawl bun lailawkna tur ngaihven tura tih niin an thil hmuh dan Health Department-ah a rang thei ang bera thehlut tura tih an ni.

ZMC-ah bungrua thleng

COVID-19 hri leng dona kawnga hman-raw pawimawh thenkhat tunhnaiah Mizoram a rawn thlen mai theihloh avanga ZMC-a RT-PCR Laboratory-ah Sample enfiah a khaihlak chhoh mek laiin nimin khan VTM 20,000, RNA Extraction 20,000 leh RT-PCR Kits 20,000 te chuan ZMC a rawn thleng leh ta tih Health Minister, Dr. R. Lalthangliana chuan a sawi a. Heng bungrua te hi Thlawhtheihna hmanga rawn phurh thlen niin hemi atana hma la tu Chief Minister leh Principal Consultant (Aviation) te chungah lawmthu a sawi bawk. Heng bungrua a rawn thlen tak avang hian ZMC-a RT-PCR Laboratory-ah Sample enfiah chhunzawm theih a ni tawh ang.

MESA in tanpuina an hlan

Mizoram Engineering Association (MESA) Member ten ramri buaina kaihhnawiha hman tur pawisa an thawhkawm chu nimin khan hmun 5-ah an semchhuak a. An sum thawhkhawm zawng zawng Rs. 3,43,000/- atanga Rs. 1,43,000/- (Puan In 4 leh Filter 5) chu Mizoram DGP hnenah hlanin Vairengte khawtlang tan cheng nuai khat, Phainuam, Saihapui ‘V’, Kanhmun leh Chuhvel khawtlang tan Rs. 25,000/- theuh an hlan bawk.

Electric Bill tihhniam phut

Mizoram Pradesh Youth Congress Committee (MPYCC) chuan COVID-19 hripui leng avangin Mizoram mipui mai ni lo khawvel a buai mek tih sawiin, Mizoram hian abik takin ei leh bar, sum dehchhuahna kawngah kan tuar na bik hle tih an sawi a. Hetiang ang hun tawn runthlak kan tawh lai mek hian Electric Bill rawn thleng chu mitin mai mak tih khawpa sang leh felhlel a ngaih theih a rawn thleng nia sawiin, mipuiin Bill an pek hma ngei a, Bill sang uchuak leh felhlel te a rang thei ang bera enfel a siamtha vat turin Mizoram sawrkar an phut thu an sawi a. Electric bill tihpunna pawh COVID-19 hripuiin min chamchilh chhung chuan hman rihloh an duh thu leh Bill pawh tihniam zawk tura sawrkar an phut thu an sawi bawk.