Oil Depot atana ram lak tur neitute Minister in a kawm

Food Civil Supplies & Consumer Affairs Minister K. Lalrinliana chuan Bairabi Rel Station bula Indian Oil Corporation Ltd. (IOCL) in tuialhthei dahkhawlna (Depot) bun a tumna hmuna ram neitu; sawrkar in ram a lak sak tura zangnadawmna diltute chu Zirtawpni khan a kawm.

He inkawmna ah hian Supply Minister chuan Mizoram in tuialhthei dahkhawlna (Depot) liantham a mamawh avangin a rang thei ang bera din a tul tawh tih sawiin, Depot din tumna hmuna ram neitute chu ram-in a mamawhna hria a, neitu rilru pu chungin Compensation an beisei ang te sawrkarin a pe theilo anih pawhin tlawmngaih chhuah a, in hnukhniam ngam turin a ngen a. Sawrkar in mamawhna avanga mimal ram a luah sak dawnin Dan hnuaiah rate fel tak ziakin dah a ni a, hetiang bak hian sawrkar chuan mi ram a laksak in, a luah sak thei lova, chutiang chu a nih avangin ram neitute chu Compensation ah tam u-chuak tak tak beisei lova, a awm tawk ah lungawina chang hre turin a chah ani.

Bairabi Rel Station bula IOCL in tuialhthei dahkhawlna (Depot) din a tumna hmunah hian ram neitu chhungkaw 24 in compensation an dil a, diltu zingah hian SSA School building pakhat; Mizoram Truck Driver Union ram pakhat; FCS&CA Department leh Commerce & Industries Department ram pakhat ve ve a tel a, hei bakah hian ram neitu nihna inchuh pakhat a awm bawk a. Helai hmuna Compensation ngai zat tur ruahman chhin chu a vaiin Rs. 7,75,22,332/- niin Assessment hi a hmunah felfai zawka lak that leh tura ruahman a ni.