Harsatna tawk te tan hma la turin sawrkar phut

Mizoram Pradesh Congress Committee (MPCC) chuan harsatna tawkte chhawmdawlna kawnga hma la tura sawrkar an phut thu an sawi.

Inrinni-a thuchhuah an siamah MPCC Media Department chuan Mizoram in hun khirh tak a tawng mek tih sawiin, COVID-19 hri leng avangin chhungkaw tam tak sum leh pai nei lova awmin Sumdawnna tam tak a tlachhia a, In luah man pe thei lo, Bill pe thei lo leh loan rul hleithei lo tam tak kan awm mek bawk tih an sawi a. Hetiang karah hian Mizoten tanpui ngaite kan thlah-thlam ngai loh zia chiang taka a lo langchhuak chu ropui an tih thu an sawi.

MPCC Media Department chuan Mizoram mipui tam zawk hna thawk thei lo a ni 100 chuang kan awm lai leh, chhungkaw tam tak eizawnna a buai vek tawh hnu pawha MNF sawrkar in chhawmdawlna lama ruahmanna engmah a siam duh miah lo chu mak an tih thu sawiin, Sawrkar hmalakna tam tak a chawlh thup avangin Budget sum pawh tam tak sawrkarin a hum dawn tih a chiang niin an sawi a, hei vang hian State Budget atanga chhawmdawlna tur ruahmanna (relief measures) hi siam theih ngei turah an ngai tih an sawi bawk.