Mizoram-a COVID-19 hri kaite enkawl dan sawihona Health Minister hovin neih a ni

Mizoram-a COVID-19 hri kaite enkawl dan chungchang sawihona chu nimin khan Health Minister Dr. R. Lalthangliana hovin neih a ni.

SAD Conference Hall-a he sawihona hunah hian Health Minister Dr. R. Lalthangliana chuan Mizoram-ah COVID-19 hri kai kan la pun belh zel tih sawiin, hri inkaichhawnna chhut chah a harsat mek lai hian kan ngaih pawimawh ber tur chu hri kaite nunna chhanhim a ni, a ti a. Hri kaite enkawltu Healthcare Frontline Workers zawng zawngte an hah rimtawng tawh hle tih sawiin, mahni inenkawl uluk chunga nunna chhan tura theihtawp chhuaha tang tlat turin a fuih a ni.

He thutkhawm ah hian khawvel hmun hrang hranga COVID-19 hri kaite an enkawl dan sawiho niin, Mizoram-a damlote enkawl dan pawh a tha thei tur ang berin a tul anga herrem hret hret zel thin a nih thute sawi a ni a, hri kaite enkawlna atana mamawh khawvel hmun hrang hranga an hman thin, damdawi tha an sawite chah thlen dan turte sawiho a ni bawk.

Hripui a darh nasat tawh avangin damlote inenkawl dan tur felfai taka mipuite inzirtir a tul tih sawi niin, a bik takin thingtlang leh hmun kilkhawr zawkah te a darh zel tak avangin inven dan tur leh inenkawl dan turte chiang zawka inhrilhfiah a tul tih a ni a, thingtlang hmun tam takah Mask vuah tur awm thatlohna a awm theih avangin heng hmun kilkhawr zawka cheng ten COVID Appropriate Behaviour awlsam taka an zawm theih nan tan lak a tul hle tih sawi a ni.

COVID-19 hri kai te hmun khata dahkhawm kalpui lai mek pawh ngaihtuahna thar seng a, ennawn a tul nia an hriat thu Doctor ten an sawi a, hri kaite In lama inenkawl (Home Isolation) chungchangah pawh dinhmun derthawng (vulnerable group) kum upate, natna benvawn nei leh natna serious takte uluk taka vil an tul thu leh fimkhur taka awmze nei zawka dahhrana enkawl uluk an ngai tih sawi niin, Home Isolation a inenkawl dan tur kaihhruaina siam pawh a tul anga ennawn a that thu sawi a ni a. Home Isolation-a inenkawlte leh CCC leh CCCC-a inenkawlte chu uluk taka mahni inchik reng tur leh harsatna an neih chuan a rang thei ang bera Doctor te hnena in report thin tura an duh thu uar taka sawi niin, damloten harsatna an tawh veleh zep lova an in report a, enkawlna pek hma hi nunna chhan nan a pawimawh em em tih sawilan a ni bawk.