National Commission for Women-ah hriattir

Tunhnaia Mizoram leh Assam ramri chung-changa buaina thlenga Lalsangpuii te nupa chunga thil thleng chu Mizoram State Commission for Women chuan National Commission for Women, Delhi-ah a hriattir.

July 26, 2021 khan John Vanlalzawna leh a nupui, Lalsangpuii (28) te hian Silchar atanga Mizoram an rawn panin thuthang leh ramri-a buaina chungchang pawh hre lovin an rawn chho a, amaherawh chu Border Disputed Area-ah Assam Police leh mipuiten lo tidingin an motor atangin an pawtchhuak a, an motor an tihchhiat hnuin an kaltir leh ta a ni.

Hemi hnu reilote ah hian hmun pakhatah Assam Police leh mipuiin lo tiding lehin an motor atangin an hnu chhuak a, hmeichhia pawh sawi lovin an nupa hian kut an thlak a, an motor pawh an tichhe nasa hle a ni. John Vanlalzawna nikhaw hre lova an awm hnu-ah pawh a nupui, Lalsangpuii, hmeichhe awm nem, mahni pawh inveng theilo tur chu Assam Police leh mipui te chuan an pawt a, an hnuk a, an sawisak mai bakah anchhia te lawhin chil an chhakkhum nia tarlan a ni.

Hetianga sawisak an nih lai hian CRPF te rawn tlazepin an nunna an chhan a, Lalsang-puii hian taksa-a nasa taka hliam a tuar mai bakah rilru lamah nasa takin hliam a tuar bawk a. He buaina an tawh hun lai hi Assam leh Mizoram an innawr hma kha niin chawhnu dar 1:30 vel a ni.

Lalsangpuii tawrhna hi Mizoram State Commission for Women chuan a la thu tak hle tih sawiin, Assam Police leh mipuite chet dan chu an dem takzet tih an sawi a. Assam State Commission for Women hnenah lehkha thawnin tunhnu ah Assam Police te leh mipuiten hmeichhe chunga hleilenna an thlentir tawh loh nan a tul anga an mi leh sa te an lo thunun ngei an beisei thu lehkha ah chuan tarlangin, he thil thleng hi National Commission for Women, Delhi a hriattir bawk a ni.