Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

COVID-19 Second Wave natna benvawn nei ten an tuar nasa tih ZMC hotu ten an sawi

COVID-19 thawhhnihna a damlo enkawlte leh nunna chanta te bihchiannaah natna benvawn nei a bikin Lung thalo, Thisen sang, Zunthlum, Tar chaklo te leh Raipuar te an ngaihtuahawm bik nia hriat a ni tih ZMC hotute chuan sawiin, CAB zawm that chu a him tawk tih an sawi bawk.

COVID-19 hri kaite enkawlna hmun, Dedicated COVID Hospital, ZMC-a thawktu te chuan COVID-19 thawhhnihna ah hian damlo an enkawlte leh nunna chanta te an bihchianna ah natna benvawn nei a bikin Lung thalo, Thisen Sang, Zunthlum, Tar chaklote leh Raipuarte an ngaihtuahawm bik nia a lan thu sawiin, hetiang mi chenpui kan nei a nih chuan fimkhurpui a tul thu leh COVID-19 hri an kai palh a nih a In lama an inenkawl an nih phei chuan uluk taka vil an ngai tih a sawi a. Damlo ZMC-a admit te, a bikin Home Isolation atanga ZMC-a phurhte chu an thlen meuh chuan an chau hle tawh tlangpui thin a, hei vang hian In lama enkawltuten uluk taka kan vil an mamawh a ni, a ti. Raipuarte hi nau neih hun tawhte leh natna langchhuak nasa te chauh ZMC-ah an admit thei tawh tih sawiin, natna lang chhuaklo te chu CCC, CCCC leh Home Isolation lamah uluk taka lo inenkawl ni se a duh thu a sawi bawk.

ZMC Director, Dr. John Zohmingthanga chuan tunhnaiah damlote mamawh damdawi pawimawh tak tak pahnih Tocilizumab leh Monoclonal Antibody phai lam atanga an chah te a chhan hriatloha a rawn thlen theihloh vangin an tlachham tih sawiin, theihtawp chhuaha hma an lak thu a sawi a, Health Minister hmalakna in ICMR in RT-PCR test kit 20,000 an pek thu leh RNA Extraction kit pawh an dawng tel tih a sawi a, vanduaithlak takin RNA Extractor an dawn chu Company dang siam a nih vangin an khawl neih nen a inmil lo tih a sawi a, Guwahati atang RNA Extractor kit lirthei hmanga rawn phurh mek a ni tih sawiin, hemi chhung hian emergency a test ngaite chauh an test theih dawn tih a sawi a, reilote ah a pangngaia test kalpui theih an beisei thu a sawi bawk.

Dr. PC. Lalramenga, Nodal Officer, CO-VID-19 Task Force, ZMC pawhin COVID-19 hripui laka kan him theihnan vaccine lak leh Sample Test ran a pawimawh tih sawiin, sawrkar leh Task Force ten Test tura min tih chuan lo hnial lova a rang thei ang bera in test tura mipuite ngenin, positive an inhmuhchhuah ran-a kan in lakhran zung zung hi kan himna tur pawimawh ber pakhat a ni tih a sawi a. COVID Appropriate Behaviour (CAB), a bik takin Mask vuah that chu a pawimawh lehzual tih sawiin, damdawi In-ah positive enkawltute an ni chungin an zingah hri kai an awm mang lo tih a sawi a, hei hian CAB zawm a him tawk tih a tarlang a ti bawk.

Dr. PC. Lalramenga chuan COVID-19 Second wave chu rin aiin kan tuar nasa tih pawh sawiin, hri inkaichhawn a awlsam avang hian mitin kan fimkhur a ngai lehzual tih a sawi a. Sample test a tam a positive kan inhmuhchhuah tam takah hian loh theihloh in In lama inenkawl (home isolation) kan tih tam a ngai dawn in a lang a, CCC leh CCCC in min daih seng lova, symptom nei lo leh symptom nei nasa lote chu uluk taka In lama in enkawl hi a pawimawh dawn tih a sawi bawk.

ZMC hotute chuan sawrkar leh khaw-tlang te kan tangrual viau chungin he hri hi kan dang seng tawh lo tih pawh sawiin, nikum lamah chuan hri kai zawng zawng deuhthaw an admit a tih theih laiin, kumin kumtir lam khan natna langchhuak nasa lo (mild symptomatic) an admit tih an sawi a. Tunah erawh chuan natna lang chhuak nasa leh damlo serious te chauh an admit chungin khum 300 chuang erh awrh an neihah mi 400 bawr vel nitin an enkawl tih sawiin, thawktu pawh volunteer mi 150 vel sawrkar in a lak thu an sawi bawk.

Comments

Chhiar Hlawhte