Latest News

Mizoram-ah hri kai sang chuang hmuh leh an ni

Niminpiah khan Mizoram-ah Sample 9058 enfiah leh niin heng atang hian COVID-19 hri kai 1088 hmuh leh an ni a, Sample enfiah zawng zawng atanga zaa 12.01 te chuan hri an kai a ni.

Niminpiah khan ZMC-a RT-PCR Laboratory-ah Aizawl leh Lunglei District atanga Sample lak 2265 enfiah niin hri kai mi 552 hmuh leh an ni a, an zinga 530 te hi Aizawl District ami niin Veng leh khua 52 ami an ni a, Aizawl Nursery Veng chu hri kai hmuhchhuah tamna ber niin hri kai mi 51 hmuhchhuah an ni a, hei bakah hian hri kai mi 30 aia tam hmuhna Veng pathum a awm bawk. Lunglei District atanga Sample enfiah atangin hri kai mi 22 hmuh an ni bawk a, an vaiin Lunglei khawpui chhung ami an ni.

District hrang hranga TrueNat Laboratory-ah Sample 346 enfiah niin hri kai mi 28 hmuh an ni bawk a, an zinga mi 10 chu Lunglei District ami niin Lawngtlai District-ah hri kai mi 10, Saitual District-ah mi 4, Mamit District-ah mi 3 leh Khawzawl District-ah mi pakhat hmuh an ni.

Rapid Antigen Test hmangin Sample 6447 enfiah niin hri kai mi 508 hmuh an ni a, Aizawl District-ah hri kai mi 370 hmuh niin an zinga 67 chu Armed Veng ami an ni a, Kolasib District-ah 53 hmuh niin Lawngtlai District-ah 34, Mamit District-ah 19, Siaha District-ah 17, Lunglei District-ah 11, Champhai District-ah mi 2 leh Serchhip leh Saitual District-ah hri kai mi pakhat ve ve hmuh an ni bawk.

Nimin khan Mizoram-ah COVID-19 hri kai mi 438 te chu hri lakah fihlimin anmahni enkawlna hmun atanga chhuahtir an ni ve leh a, heti hian nimin tlai dar 5:00 thlenga Mizoram-a hri kai hmuhchhuah chu 42,083 ni tawhin an zinga 29,299 te chu enkawl dam an ni tawh a, hei hi hri kai hmuhchhuah atanga chhutin za zela 69.62 a ni a, tunah hian hri kai enkawllai 12,626 an la awm mek bawk a ni. Nimin chawhnu dar 1:20 khan Lalhmunsanga (57), Zotlang Aizawl chu ZMC-ah boral ve lehin Mizoram-a hri kai zingah mi 158 an boral ta a ni.

Comments

Popular News (Last 30 Days)