State pahnih aiawh ten thuchhuah intawm an siam

Tunhnaia Assam leh Mizoram ramri-a buaina thleng avangin nimin khan State pahnih aiawhte chuan inbiakna neiin thuchhuah intawm an siam.

Assam leh Mizoram aiawhte inbiakna hi Aijal Club-ah neih a ni a, inbiakna an neih zawh hnua thuchhuah intawm an siamah Ministry of Home Affairs, Govt. of India, Mizoram Chief Minister leh Assam Chief Minister ten ramri buaina chinfel a nih theihna tura hma an lak mek chu Mizoram Sawrkar leh Assam sawrkar chuan tha an tih thu tarlangin, ramri hrula boruak ralmuang a awm thuai tha tiin ramri chungchangah inremna tluantling a awm theih nan thu inchuh laite chu dawhkan kila sawiho nise an ti.

State pahnih te chuan ramri hrul ah remna leh muanna a awm theih nan hmalak remti in, remna leh muanna a awm theihna tura Central Sawrkarin vengtu sipai an rawn dahlut tur pawh rem an ti ve ve a, boruak tha tak a awm theih nan tunhnaia State pahnihte an in tihbuaina hmunah te State Police te leh Forest lam hnathawktute chu dahbelh emaw, Patrolling ti tur emaw, helai hmuna inbengbel tur emaw, hma la tura intirhluh loh an rem ti bawk a. He inremsiamna hian Mizoram leh Assam ten ramri an intawmna hmun – Karim-ganj District, Hailakandi District, Cachar District, Mamit District leh Kolasib District-a ramri hrulte a huam ang. Hei bakah hian Mizoram leh Assam sawrkar aiawhte chuan an State pahnih huamchhung, a bik takin ramri hrulah remna leh muanna a awm theihna tura hmalak leh theihtawp chhuah an rem ti tlang bawk a ni.

He thuchhuah intawm ah hian Mizoram aiawhin Home Minister Lalchamliana leh Home Secretary Vanlalngaihsaka ten hming an ziak a, Assam aiawhin Border Protection & Development Minister Atul Bora leh BPD Secretary GD. Tripathi ten hming an ziak bawk a ni.