Mizoram-ah hri kai 44,239 hmuh an ni tawh

Mizoram-ah COVID-19 hri kai hmuhchhuah chu 44,239 an tling ta a, Inrinni-a Sample enfiah atangin hri kai 709 hmuhchhuah niin Sample enfiah atanga za zela 7.69 te chuan hri an kai a ni.

Inrinni khan ZMC-a RT-PCR Laboratory-ah Sample 205 enfiah niin hri kai 38 hmuh an ni a, an zinga mi 33 te hi Aizawl District-a Sample lak te niin Veng mal-a hri kai hmuhchhuah tam lutukna a awm lova, Veng mal-a hri kai mi 4 hmuhna Veng pahnih awmin hri kai mi pathum hmuhna Veng pakhat a awm a, hri kai mi pahnih hmuhna Veng pahnih awm bawkin Veng leh khua 15-ah hri kai mi pakhat theuh hmuh an ni bawk. Heng bakah hian Lunglei District atanga Sample lak atangin hri kai mi 5 hmuh an ni bawk.

District hrang hranga TrueNat Laboratory-ah Sample 78 enfiah ni bawkin heng atang hian hri kai mi 11 hmuh an ni a, an zinga mi 6 te chu Kolasib District ami niin Aizawl District-ah 3 leh Champhai leh Lawngtlai District-ah hri kai mipakhat ve ve hmuh an ni bawk.

Rapid Antigen Test hmangin Inrinni khan Sample 8925 enfiah ni bawkin hri kai mi 660 hmuh an ni a, an zinga mi 317 te chu Aizawl District-a hri kai hmuhchhuah an ni a, Bethlehem Vengthlang-ah hri kai mi 60 zet hmuh niin Maubawk-ah 39 leh Edenthar-ah 30 hmuh an ni bawk. Mamit District-ah pawh hri kai mi 105 hmuh an ni a, an zinga mi 80 zet chu Thaidawr khua ami an ni a, Kolasib District-ah hri kai mi 104 hmuh niin Siaha District-ah 52, Champhai District-ah 45, Lawngtlai District-ah 28 leh Lunglei District-ah mi 9 hmuh an ni bawk.

Mizoram-ah a ni telin hri kai enkawl dam an pung ve zel a, Inrinni khan mi 893 enkawl dam an ni ve leh bawk a, nimin khan tlai dar 5:00 thlengin mi 426 te enkawl dam an ni leh bawk. Heti hian nimin tlai dar 5:00 thleng khan Mizoram-ah hri kai 44,239 hmuhchhuah an ni tawh a, an zinga 31,819 (71.93%) te chu enkawl dam ni tawhin tunah hian hri kai enkawllai 12,253 an la awm mek bawk a ni.

COVID-19 hri kai zingah mi 167 zet an boral tawh :

Mizoram-a COVID-19 hri kai zingah mi 167 zet an boral tawh. Inrinni zing dar 7:15 khan Lalthlamuana (71), Saikhamakawn chu COVID-19 vangin ZMC-ah a boral a, Inrinni zan dar 9:25 khan J. Malsawma (65), Sakawrdai chu ZMC-ah bawk boral lehin nimin zing dar 2:00 khan R. Daniela (56), Vairengte chu ZMC-ah a boral ve leh a. Nimin zing dar 4:20 khan Lalthansiama (61), Chawnpui Aizawl chu Adventist Hospital-ah boral ve leh bawk. Hemi hnu nimin chawhma dar 10:00 khan KV. Lalhlimpuia (81), Tuikual North chu COVID-19 vangin an chenna In ah a boral a, Lalbiaksiami (48), Upper Republic, Aizawl chu nimin chawhma dar 11:15 khan ZMC-ah a boral ve leh bawk.