Chanchin thar thenkhat :

Bail in chhuah lailawk

Kawlbem khaw pa, Daikhanlama s/o Gindo-thanga thihnaa mawhphurtua puh Ngopa khaw mi pasarih te chu bail-a chhuah lailawk an ni a, CID Crime-in thubuai hi an chhui niin thudawn a ni. Thudawn danin, bail-a chhuah lailawk Ngopa khaw mi pasarihte chu Court-a an inlan hun tur bituksak an ni a, CID Crime lamin an thubuai khawihin, Daikhanlama thihnaa an inhnam-hnawih dan ngawrh takin an chhui mek nia hriat a ni. Daikhanlama leh a nupuite chu Ngopa Ruihhlo Do Pawl ten July 1, 2021 khan manin, hemi hnu hian Daikhanlama hi a boral a, he thihna chungchangah hian Police-te chuan July 5 khan Ngopa Ruihhlo Do Pawl hruaitu zinga mi mipa panga leh hmeichhe pahnih, an vaiin mi pasarih an man a ni.

AMC-ah Partial Lockdown

Mizoram State Executive Committee Chairman leh Chief Secretary, Lalnunmawia Chungo chuan nimin, August 8, 2021 atanga August 14, 2021 zanlai dar 12:00 thlenga AMC huamchhunga hman tur Partial Lockdown kaihhruaina chu Inrinni khan a tichhuak a, kaihhruaina siam tharah hian pawn chhuah leh inlenpawh khap tlat niin, building khata cheng te pawh inlen pawh khat a ni a. Zirna In chu dan pangaiin khar chhunzawm tur a ni a, phalna nei tan exam ang chu neih phalsak a ni. Kohhran inkhawm pangngai neih phal a ni lo a, zing leh tlai lam tawngtai inkhawm erawh phal a ni. Mipui punkhawm ang chi reng reng khap niin a huhova chhuah ang chi pawh khap a ni a, Damdawi In leh damdawi thiamna hmanna dawr chi te hawn phal a ni bawk.

Mizoram-ah lirthei rawn lut

July 26, 2021-a Assam leh Mizoram ramri chungchang buaina thleng avanga Assam atanga lirthei rawn lut a awm mumal loh hnuah Inrinni zan atang khan Mizoram lamah Motor a rawn lut leh ta a. Nimin tlai dar 5:00 thleng khan HMV 61, MMV 74, LMV 55, LPG phur 1, Oil Tanker 17 leh Sumo pakhat a rawn lut tawh a ni.

Insuamna chhui zui zel

Tun thla ni 4-a Mamit District chhung, Bung-thuam khaw tlangval suamtute chu chhui zui mek zel an la ni. Thudawn danin kar kalta Nilaini, Aug. 4, 2021 khan Bungthuam tlangval Lalmuanawma Ralte s/o R. Lalrintluanga chu Kanhmun-a dawr bungraw la tura Bolero hmanga a kal chu Bungthuam leh Luimawi inkar, Goboi Lei thlen hma deuhah hmai tuam mi pali, Mizo tawng pai, silai keng ten ti dingin, Rs. 28,450 an chhuhsak nia sawi a ni a, heng mite hi Bru hel pawl mi nia rin niin Kanhmun Police Station-ah FIR ziahluh a ni a, Police lamin mi engemaw zat thu zawtfiah tawhin he thil thleng hi ngawrh taka chhui chhunzawm mek zel a ni.

PC Party in sawrkar an ngen

Peoples' Conference Party chuan Assam sawrkar nena inbiakna chhunzawm hrih tawh lo turin Mizoram sawrkar an ngen tih an sawi. Nimin a thuchhuah an siamah PC Party chuan Mizoram sawrkarin Assam nena boruak muan-awm tak kan neih beiseia inbiakna dawhkan a kilpui Assam sawrkar Oficial ten Mizote phiarrukna remchanga an hmang ta mai chuan thenawm State te rinawm lohzia leh inbiakna Dawhkan kilpui tlak an nih lohzia a tilang chiang hle ah an ngai tih an sawi a, hei vang hian bumna leh phiarrukna hmanga phuba lak tum Assam sawrkar be chhunzawm tawh lo turin an ngen a ni.