Kalphung mumal tak neihloh vanga hri kai pung ah ngai

Mizoram Pradesh Congress Committee (MPCC) thupuangtu Dr. Lallianchhunga chuan Mizoram sawrkarin kalphung mumal tak a neih loh avangin hri kai an pun phah niin a sawi.

Inrinni-a Aizawl Press Club-ah thuthar lakhawmtute a kawmna ah MPCC Media Chairman Dr. Lalianchhunga chuan sawrkarin COVID-19 hripui leh RT-PCR a do kawp avangin mipuiin an tuar niin a sawi a. “Hripui do hi sawrkar tih tur a ni a; mahse, RT-PCR a do leh zel kha mipui tan a pawi a, Congress party pawhin kan ngai thutak hle a ni,” a ti a. April 7, 2020 daih tawh khan Verdana Gurnani, Addl. Secretary & Mission Director NHM, Govt. of India chuan State tin Health Secretary/Commissioner-te lehkha a thawn a. ‘India COVID-19 Emergency Response & Health System Preparedness Package’ hnuaiah Laboratory dinna tur te, Laboratory awm sa tih changtlunna tur te ruahmanna engkim a awm thu tarlan a ni a. He package hnuaia hmalakna te hi za a za (100%) Central tum tur a ni a. Heti chung hian Mizoram sawrkar chuan Laboratory din belh lam a ngaihtuah duh miah lo niin a sawi.

Dr. Lallianchhunga chuan Mizoram-a COVID-19 a darh vakna chhan chu Mass Testing neih tlai anih vang ah MPCC chuan an ngai tih sawiin, MPCC President Lal Thanhawla chuan June 7, 2021 khan Mass Testing hi a lo rawt tawh niin a sawi a. “A tira kan rawtna te sawrkarin ngaithla se, nikum atang khan District Hospital tinah RT-PCR Laboratory din belh zung zung se, Test tam zawk hi RT-PCR hmanga test ni se tun dinhmun hi kan thlen a rinawm loh a ni,” a ti.

Chhawmdawlna lamah sawrkar hmalakna a awm lo nia sawi bawkin, “Khawvela lockdown puang rei ber leh puang zing ber kan ni a. Mi tam tak eizawnna a buai phah a, chhawmdawl ngai chhungkaw sang tam tak an awm phah a. Heti chunga chhawmdawlna lamah sawrkarin cheng khat pawh a seng duh lo hi mak kan ti hle a ni,” a ti a. Sawrkar chu sum a ngah tawk niin a sawi bawk.

MPCC thupuangtu chuan sawrkar chu Covid thawh hnihna leh thawh thumna ah te a inbuatsaih tha tawk lo niin a sawi bawk a, “Health infrastructure tihhmasawnna lamah central sawrkar a inhuam thui hle. Hei hi remchanga lak a, hriselna ruhrel (health infrastructure) tihhmasawnna lama nasa taka tan lak hun tak a nih laiin hmalakna a chak tawk lo hle,” a ti a. “Mi tlemte hlawkna tur Phullem phah mai maia hri hi do loin, sawrkar laipui inhawnna hi remchanga la a Hospital awmsa tih changtlunna tura hmanraw tha leh changkang lei te, thawktu lak belh nan te hmang turin kan duh a. RT- PCR hi District Hospital tinah bun turin kan duh a ni,” a ti bawk.