Hri leng avanga inkharkhipna kalpui mek dan thlirhona Health Minister hovin neih a ni

Tun thla ni 21 zanlai thlenga AMC huamchhunga Partial Lockdown leh Mizoram chhung hmun danga inkhuahkhirhna kalpui dan thlirhona chu nimin khan neih a ni a, Aizawl District pawn lamah hripui a darh tan tih tarlan niin a bik takin Kolasib District leh Lawngtlai District te chu vil uluk lehzual an tul nia sawi a ni.

SAD Conference Hall-a he thutkhawm ah hian Health Minister Dr. R. Lalthangliana chuan Total Lockdown puan chhung leh Partial Lockdown puan chhung hian Aizawl khawpui leh Mizoram hmun hrang hrangah COVID-19 hri pui inkaichhawnna chhu chat turin theihtawp an chhuah tih sawiin, Sample Test runpui hmun tam takah neih niin Emergency Sample Test pawh hmun engemaw zatah hlawm lian deuha kalpuiin hri kai hmuhchhuah hma a, lakhran zung zung tumin theihtawp an chhuah thu leh hei hian rah tha a chhuah tan ta nia alan thu a sawi a. Tunhnaiah hri kai thar zat a tlakhniam bakah ZMC leh hri kai enkawlna hmun hrang hrang phurrit pawh a zangkhai ta nia a lan thu a sawi bawk.

He hunah hian Dr. Pachuau Lalmalsawma, SNO IDSP chuan COVID-19 First Wave-ah khan naupang kum 18 hnuailam hri kai mi 513 awmin chu chu hri kai hmuhchhuah zawng zawng 4476 atanga chhutin 11.46% an ni tih sawiin, Second Wave-ah August 15, 2021 thleng kum 18 hnuailam hri kai mi 12,529 awmin Second Wave-a hrikai tawh zawng zawng 43,986 atanga chhutin 28.48% an ni tih a sawi a, hei hian vaccine la la ve thei lo kum 18 hnuailamte Third Wave lo thleng tur an sawi lakah kan venhim a tul zia a tilang chiang hle a ni, a ti.

He hunah hian Aizawl District pawn lamah hripui a darh tan tih tarlan niin a bik takin Kolasib District leh Lawngtlai District te chu vil uluk lehzual an tul tih sawi a ni a. Scool Education Department hotute chuan Thingtlang lama hri kai awm lohna khua ah te zirna In hawng tan turin ruahmanna an siam tih sawiin, khawtlang hotuten an ngenna ang bawhzuiin District Bawrhsap kaltlangin uluk taka endik a nih hnuah phalna te hi pekchhuah tura ruahmanna siam a nih thu leh District then-khatah chuan khaw engmawzat ah DC ten phalna an pek tawh thu an sawi a ni.

Hei bakah hian Zirtirtute leh sikul-a thawk Non-Teaching Staff te COVID-19 vaccine pek kim thuai a tul thu tarlan niin, Vaccination Drive a tul anga nei turin ruahmanna siam tha an ti bawk.