Latest News

Medical Operational Team in Lunglei an tlawh

Lunglei District-a Covid-19 hrileng dinhmun tlangpui leh a dolet kawnga hmalakna kal mek leh hmalak tul te zirchiangin Medical Operational Team on COVID-19 (MOT)-te chuan nimin khan Lunglei an tlawh a, Lunglei District-a hri leng dona kawnga thawktute nen inkawmna an nei bawk.

MOT hian an Chairman Dr. ZR. Thiamsanga MLA hova Lunglei hi tlawhin Lunglei District MLA thenkhat te leh District Level Task Force on Covid-19-te nen Lunglei DC Conference Hall-ah nimin khan an inkawm a, he hun hi Agriculture Minister C. Lalrinsanga chuan kaihruaiin Medical Operational Team on COVID-19 (MOT) member-te chuan Covid-19 hrilengin min kiam san hun tur a hriatlova, zawi zawia nunphung pangngai a kan kir a ngaih avangin mipuiten Covid-19 nena chen ho kan zir a tul takzet a ni, tiin invenna hmanrua tha ber chu mitin in kan tih theih vek Covid Appropriate Behavior (CAB) zawm hi a ni, an ti bawk.

He hunah hian July 19-a tihchhuah Revised Discharge Protocol chungchang pawh sawiho a ni a. He protocol hnuaiah hian natna lang chhuaklo te zingah natna hrik hmuhchhuah a nih atanga ni 10 (sawm) chhung chu uluk taka enthlak (observe) niin enthlak chhunga a tawp lam ni 3 (thum) chhunga khawsik an neih tawh loha harsatna an neih loh chuan chhuah (discharged) theih an ni a, chhuah dawnah RAgT/TrueNat/RT-PCR-a test a ngai lo a ni.

COVID-19 hri kai natna langchhuakte zingah natna a lan chhuah atanga ni 10 (sawm) chhung uluk taka enthlak niin enthlak chhunga a tawp lam ni 3 (thum) chhung emaw, a aia rei emaw khawsik an neih lohva, Oxygen Saturation pawh 95% aia sang (i.e, Sp02>95%) a nih bawka, harsatna an neih loh chuan chhuah (Discharged) theih a ni ang. Chhuah dawnah RAgT/TrueNat/RT-pCR a test a ngai lo. COVID-19 hri kai damlo na zual leh natna benvawn neite chu ni 3 (thum) chhung khawsik an neih tawh loh bakah, ni 3(thum) chhung an Oxygen saturation pawh 95% aia sang (i.e. Sp02>95%) a nih bawk chuan RT-PCR Test tih tur a ni. RTPCR test result a zirin test leh enkawl chhunzawm dan tur ruahmanna siam a ni.

Covid-19 symptom lan hma ni 2 leh symptom lanchhuah hnu ni 5 chhung hi midang kaichhawn theih hun lai a nih thu MOT member te chuan an sawi a. Symptom lanchhuah atanga ni 5 hnuah chuan kan taksa a natna do tu (neutralizing antibodies) a rawn tam a, chu chuan virus rawn beiin viral load chu a tlahniam a ni. Tuna discharge protocol hman mek hi a him tawk thu leh WHO, ICMR leh CDC-te pawhin hetiang ang inkaihhruaina hi an pawm thu MOT member te chuan an sawi a ni.

Comments

Chhiar Hlawhte