Chanchin thar thenkhat :

/

Sports Minister in tlawh

Sports Minister Robert Romawia Royte chuan nimin khan Khelo India sum cheng nuai 500 senga MSSC Mini Sports Complex, Leng-pui-a Football Astroturf Field siam mek chu a tlawh a, tunah hian Football Field hnathawh chu zawh tawh niin Pavillion leh Compound Light System sak mekte chu tun August thla chhunga zawh theih beisei a ni bawk. Sports Minister hian helai hmuna Hockey Ground leh Sports Facilities dangte siamna tur hmun pawh a en nghal bawk.

Sports Minister hian nimin vek khan Khelo India sum cheng nuai 550 senga Muallungthu MSSC Complex-a Hockey Astroturf Ground siam mek leh cheng nuai 500 senga Football Astroturf Ground siam tharna hmun tur pawh a tlawh nghal a. Heng Field pathum-a hna thawh mek hi Decor India Pvt Ltd., SAI empanelled contractor ten an thawk a ni.


Health Minister hnenah hlan

Mizoram Pharmacists’ Association chuan Mizoram-a COVID-19 hri kai, a bikin thingtlang lama cheng, damdawi leh mamawh lamkhawmna tura buaithlak deuhte hnena COVID Kit sem chhuah tur Damdawi, Oximeter leh thildang thahnem tak chu nimin khan Health Minister Dr. R. Lalthangliana hnenah an hlan a, heng an thil leina tur hian Rs. 311,200/- zet an thawhkhawm a ni. Mizoram Pharmacists’ Association member te hi sawrkar hnathawk leh thawklo te niin, Mizoram State Pharmacy Council-a in register te inzawmkhawm pawl a ni a, an bungraw hlan te hi CMO te kaihhruaina hnuaiah District tina Pharmacist te, khaw hrang hrang a Medical Team leh Local Task Force te nen tang tlangin semchhuah dan tur ruahmanna siam a ni.


Home-ah hri kai hmuh tam

Operation Kingdom Ministry Home, Phun-chawng-a awmte chu nimin khan an Sample enfiah sak niin Home-ah awm mi 151 te Sample enfiah ah COVID-19 hri kai 116 hmuh an ni a, hri la kai lo te pawh a tul anga vil zui tur an ni ang.


Vawk 21,894 zet thi tawh

Mizoram District 11-a khua leh Veng 225 te chu Vawk natna hri, African Swine Fever (ASF) lenna hmunah puan a ni tawh. Kumin March thla vel atanga Mizoram-a ASF hri a len hnuah nimin thleng khan Mizoram-ah ASF vanga Vawk thi 21,894 zet a awm tawh a, heng te hi Veng leh khua 225 ami te niin he hri hi Mizoram District tinah a leng tawh a, nimin khan ASF vang hian Vawk thi 265 a awm leh bawk a ni. Hetihlai hian nimin khan AH&Vety Department hriatpuina in Vawk 78 suat leh niin nimin thlenga Mizoram-a Vawk suat chu 8368 a tling tawh bawk ni.

Nimin thleng khan Mizoram-a Veng leh khua 99 te chu Vawk hrilenna-a rinhlelh ala awm bawk a, nimin khan chhan hriatloh a Vawk thi 34 awm leh bawkin ASF nia rinhlelh, chhan hriat loha Vawk thi 707 a awm tawh bawk a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »