Latest News

Ramri-a Duty te tanpuina tur Vairengte panpui

Tunhnaia Mizoram leh Assam ramri chungchang buaina thleng avanga Mizoram ramri venhim hna thawktute tana Serchhip Sub-Hqrs. YMA in tanpuina a khawn te chu Vairengte lama hlan turin nizan khan Serchhip atangin phurhthlak a ni.

Serchhip Sub-Hqrs. YMA hian ramri veng a thawktute tan hian chawhmeh leh eitur chi hrang hrang baka pawisafai thawh duhte tan Town chhunga Branch YMA 21-ah a lakkhawm hna a thawk a, heng te hi nizan khan Serchhip Sub-Hqrs. Office atangin Vairengte hi panpui niin heng tanpuina thlahna hunah hian Serchhip Sub-Hqrs. YMA President, Kawlthuama chuan an hmalakna mipuiin an hlut leh an beisei aia tam thilpek an dawng chu lawmawm a tih thu a sawi a. Serchhip Sub-Hqrs. YMA Vice President, Lalrammawia chuan heng tanpuina hlan turte hi tawngtaina in a thlah a ni.

Serchhip Sub-Hqrs. YMA Secretary, PC. Vanlalluna sawi danin tun tuma tanpuina an lakkhawm te hi chawhmeh leh thlai bakah eitur (407 Truck trip khat, Pik-up Truck trip 2 leh 207 Truck trip khat) leh pawisafai Rs. Rs. 2,95,022/- a ni a. Heng eitur te hi Vairengte-a Police Duty te hnenah hlanin Vairengte Joint YMA hnenah Rs. 100,000/- hlan a ni anga, Saihapui ‘V’ leh Phainuam Branch YMA te hnenah Rs. 10,000/- ve ve hlanin tunhnaia Vairengte tlangval hliam tuar chu Rs. 5000/- in kan a ni anga, hei bakah hian tanpuina hlan tura kal ten engemaw zat pai bawkin tuna an hlan bak hi SEC in a hlan dan tur ala ruahman leh dawn a. Tanpuina hlan tur hian Serchhip Sub-Hqrs. YMA Asst. Secretary K. Laltlanmawia leh Fin. Secretary Zolianmawia te hovin mi 12 an kal a ni.

Comments

Popular News (Last 30 Days)