Health Minister hovin Mizoram-a COVID-19 hri leng mek dinhmun thlirhona neih a ni

Nimin khan Health Minister Dr. R. Lalthangliana hovin Health Department hotuten COVID-19 hrileng dona kawnga hma an lak dan an thlirho.

He thlirhona SAD Conference Hall-a neih ah hian COVID-19 hripui leng dona atana mamawh hmanrua leh damdawi dinhmun a that thu tarlan a ni a, Rapid Antigen Test (RAgT) Kit pawh tuna hman dan anga chhutin kar hnih daih a la awm thu leh nuai 3 dang lei belh leh tum a nih thu tarlan niin, Viral Transport Medium (VTM) thla 5 daih a la awm thu sawi a ni a. ICMR-in RT-PCR Test kit 20,000 a thlawna an rawn pek chu nikum lama siam a nih vangin a hlui deuh tawh a, a hman theih loh vangin Health Minister hmalakna in ICMR-ah hriattir a nih thu leh an rawn thleng leh dawn tih sawi a ni. RNA Extraction kit 20,000 Delhi atang a rawn thlen leh dawn thu leh Guwahati atang 1000 a rawn kal mek thu pawh sawi niin, reilote ah mumal takin RT-PCR Test kalpui leh theih beisei a nih thu tarlan a ni a. PPE kit pawh Commerce & Industries hmalakna zarah phang lova an awm thu leh mamawh dang Mask chi hrang hrang, Sanitiser, Sodium Hypochloride leh thildangte pawh thlaphanawm a nih loh thu tarlan a ni bawk.

He huna tarlan a nih danin ZMC-ah COVID-19 vanga nunna chan April thla ah mi 4, May thla ah mi 24, June thla ah mi 50, July thla ah mi 42 leh August thla ah ni 12 chawhma lam thlengin mi 16 an awm tawh a, ZMC pawnlam ah nunna chan an awm nual tawh bawk a ni. ZMC-a hmasawnna hna thawh mekte pawh theihtawp chhuaha hmalak zel a nih thu tarlan a ni a, thawktute zingah hri kai an awm leh thin avang leh Quarantine ngai an awm leh thin avangin duh anga chakin a thawh theih loh a, CPWD in Oxygen Plant 1000LPM an siam mek chu August ni 15-a peihfel tum a nih laiin loh theih loh thil avangin August 30-ah zawhfel an inbeisei tih sawi a ni a, hmanraw mamawhte Guwahati atanga rawn thawn tura tih tunhnai ramri boruak vanga tangkhang pawh tunah hian rawn thawn chhuak tura buatsaih mek a ni bawk.

ZMC-a khum 25 awmna NICU,  kum 10 awmna PICU leh khum 10 awmna tho HDU te chu an peihfel thawkhat tawh a, Oxygen Outlet siam la ngaiin phai lam atangin Technician te an rawn kal thuai dawn tih tarlan a ni a. LG Electronics in Oxygen Pipeline an tum dawn tih tarlan a ni bawk. Aizawl Civil Hospital-a COVID-19 hri kai, negative tawh, Ventilator la mamawh chhunzawm te dahna tur ICU khum 10 awmna chu peihfel tep a nih thu tarlan a ni a. COVID-19 hri kai negative tawhte zinga mi thenkhat chu COVID-19 hrik in an Chuap a lo tihchhiat nasat tawh thin avangin enkawl zui an ngai thin tih he hunah hian tarlan a ni bawk.