Latest News

NH. 306 dan pin hi thil tha lo tak, mihring puite dikna leh chanvo hnualsuatna a ni - Governor

Mizoram Governor thar Brig. (Dr.) BD. Mishra (Retd) chuan ramri buaina avanga Mizoram mamawh lakluhna kawngpui National Highway 306 dan pin a ni thin chu thil tha lo tak, mihring puite dikna leh chanvo hnualsuatna a ni tih sawiin, he harsatna chinfel dan awlsam ber chu KMMTTP a rang thei ang bera siam zawh a ni, a ti.

Mizoram Governor thar hian Mizoram sawrkar hmalakna pawimawh deuh te belchiang turin nimin khan Home Department, Health Department and Public Works Department hotulian te Raj Bhavan-ah a kawm a, he hunah hian Mizoram leh Assam ramri buai chungchanga Mizoram sawrkar dinna, hmalakna kal mek leh hmachhawp te ngaihthlak niin heng Department aiawh te hian an hmalakna pawimawh zual te sawiin, Home Department aiawhin Vanlalngaihsaka, Secretary leh David H. Lalthangliana, OSD ten report an pe a. COVID-19 hrileng dona kawnga Mizoram sawrkar hmalakna kal mek te leh sawrkarin hmachhawp a neih te Health Secretary R. Lalramnghaka’n sawiin, Mizoram tan mai ni lo, India Hmarchhak leh India ram tana Project thawh mek - Kaladan Multi-Modal Transit Transport Project chungchang chu PWD atangin Lalruatkima, Chief Engineer (Highways), PWD chuan report a pe a. He project a khawmuan chhan te chiang takin a sawifiah tel bawk.

Sawrkar Department aiawh ten an hmalakna an tarlan hnuah Governor Brig. (Dr.) BD. Mishra (Retd) chuan ramri buaina chungchang chu ralkhat atanga a lo hriat aia a chian thar sawt thu sawiin, buaina chinfel kawng chu Silaimu hmetpuak tawh miah lova boruak muanawm tak nen zawh a tul hmasa tih a sawi a. Thuneitu sang zawk – State Level anga ramri buai chingfel tura indawrna atan ramri hrula District-ah te boruak muanawm a awm ngei ngei a tul hmasa tih sawiin, ramri hrul District hotute an pawimawh hmasa ber tih a sawi a. Ramri hrula District thuneitute hi State pahnih karah boruak muanawm a awm theih nan an inthianthat a ngai a, nitin emaw a theih anga zingin an inbiaktawn a, chanchin an in hrilh reng a tul a. Forest Official te pawh Police hruaia ramri buai lai an tlawh loh a ngai bawk a ni, a ti.

Governor chuan ramri buaina avanga Mizoram mamawh lakluhna kawngpui, NH. 306 dan pin a ni thin chu thil tha lo tak, mihring puite dikna leh chanvo hnualsuatna a ni tih sawiin, he harsatna chinfel dan awlsam ber chu Kaladan Multi-Modal Transit Transport Project (KM-MTTP) a rang thei ang bera siam zawh a ni, a ti a. PWD hotute chu he project pawimawh tak chak zawka thawk tur leh project hnathawhna tur sum tang mek pawh nawrchhuah a nih theih nan Central sawrkar nawr turin a chah a. A tul chuan Governor a nihna ang pawhin Central Sawrkar dawr a inhuam thu a sawi bawk. Tunah chuan NH. 306 hi Mizoram nunna hnar ni rih mah se KMMTTP siam zawh a nih hun chuan Mizoram tan nitin mamawh leh bungraw chawkluhna kawngpui zau zawk leh awlsam zawk a awm dawn tih Governor chuan a sawi a. He kawngpui hi Mizo-ram tan mai ni lo, India hmarchhak leh India ram pum tana Project pawimawh tak a ni tih a sawi bawk a ni.

COVID-19 hrileng dona kawngah Mizo-ram Sawrkar a che tha tawka a hriat thu pawh Governor chuan sawiin, amaherawhchu, hrileng tawp hun a hriatloh avangin Health Department chu damlo khum siambelh kawngah te, COVID-19 hri veite enkawlna bik Hospital siambelh kawngah te, Oxygen a tam thei ang ber khawl chungchang ah te, Ventilator tam zawk neih belh chung ah te, a thawktu in lak belh kawngah te, Vaccine chak zawka pe tur te, hrivei te enkawlna bik damdawi tam zawk nei tur te leh COVID-19 hrileng dona kawnga fimkhurna mipui hnena nasa zawka zirtir kawngah te tha thlah lova tangmar pat turin a chah bawk.

Comments

Chhiar Hlawhte