Latest News

Chanchin thar thenkhat :

Governor in President hmu

Mizoram Governor thar Dr. Haribabu Kam-bhampati chuan Inrinni khan India President Ram Nath Kovind chu a chenna, Rashtrapati Bhavan, New Delhi-ah a hmu a,. Governor hi Lady Governor Jayashree Kambhampati chuan a tawiawm a ni. Governor Haribabu hi thla hmasa July 19 khan Mizoram Raj Bhavan-ah rinawmna tiam tirin Governor atan lakluh a ni a. Tun hi Governor a nih hnuah President a hmuh vawikhatna niin President nen an inkawmnaah hian Mizoram State tana thil pawimawh tak tak an sawi a ni. Governor leh Lady Governor te chuan President hnenah hian Mizo Puanchei leh Mizoram a mi Theirah thenkhatte an pe tel bawk.


Oil leh Gas thleng leh tan

Assam lamin Mizoram chak lakna kawng a danpin avangin Tripura atangin Mizoram mamawh bungrua lakluh mek a ni. Tunhnaia ramri-a buaina thleng avanga tuialhthei lakluh lama harsatna a awm avanga Tripura atanga Oil phur tura kal MIZOFED Oil Tanker pahnih chuan Inrinni zan khan Aizawl an rawn thleng a, Supply Department Director, Ramdinliani sawi danin Tripura kaltlanga tuialhthei chawkluh dan tur ruahmanna hi hun engemawchen atang khan buaipui a ni tawh a ni. Tun tuma Oil lakluh hi Dharmanagar Oil Depot, Tripura atanga phurluh niin LPG hi Bishalgarh Bottling Plant, Tripura atanga phurh luh tur a ni dawn a, a tumkhatna atan MIZOFED chuan Tanker 4 leh LPG phur truck 2 tirin Private Truck 13 chu Mizoram panin kalkawngah an thang mek bawk a. Hei bakahhian Truck engemaw zat chu Tripura lam panin an chhuak leh mek bawk a ni.


Buhfai chawkluh phalna hmu

Ramri hrul a buaina thleng avanga Assam in Mizoram mamawh chawkluhna kawngpui a dan hnuah FCI atanga Tripura, Dharmanagar FCI Depot atanga Mizoram-in Oil leh LPG lakluh phalna a hmuh hnuah, buhfai chawkluh phalna pawh a hmu fel leh tawh bawk.


MADC CEM hovin hmalak dan tur sawihona nei

Mara Autonomous District Council (MADC) CEM, N. Zakhai chuan Siaha khawpui chhunga NGO leh All Political Party Meeting ko in kum 2020-a Mizoram Protocol List (Warrant/Order of Precedence) tihchhuah chungchang sawiho a ni a, hemi chungchang hi Chief Minister hnenah thlen niin August 15, 2021 hma tihfel sak ngei tura ngen a ni a, a hlawhtlin hma chuan hmalak chhoh zel nise an ti bawk. Mizoram sawrkarin State Protocol List a tihchhuah ah hian District Council chu Main Warrant-ah a telh loh bakah CEM, Chairman leh Member of District Council te dinhmun a ziak lang lo bawk a ni.


Hri leng dona hmanrua Assam lamin dang mek

Mizoram Health Department bungraw pawi-mawh RAgT Test Kid 2,00,000 phurtu lirthei leh Oxygen phurtu lirthei te chu Mizoram rawn lut thei lo turin Assam lam in an dang. Silchar Mizoram House a Deputy Resident Commissioner (DRC) S. Kaptluanga sawi danin, Assam in Mizoram mamawh lakluhna kawngpui ber an dan chah mek ah hian Covid kaihhnawih bungraw pawimawh phur te chu lirthei tangkhang zingah an tel a, Mizoram lut tur Oxygen phur lirthei 1109 Truck, Delhi atanga lokal chu Zirtawpni zan khan Silchar Mizoram House Compound luhpui tawh niin, ramri a duty CRPF venna hnuaiah Mizoram luhpui tum mek a ni. Hei bakah hian RAgT Test Kit 1,00,000 phur lirthei chu Silchar a TCI Express Kudam-ah dahthat ni bawkin, Test Kit 1,00,000 dang pawh Guwahati-ah a la tangkhang mek bawk a ni.

Silchar Mizoram House DRC chuan Silchar-a Mizoram House-ah khualzin mi 25 leh Oil phur lirthei 2 tangkhang an awm mek thu a sawi a, khualzin tangkhang te hi Mizoram House a awmsa te bakah House pawnlam a thleng, fimkhur thil a Mizoram House a lutte an ni a. Boruak awm dan sawithiam a har thu leh tun dinhmunah chuan thil thalo thleng thei a awm rihlo ni a a lan thu a sawi bawk.

Comments

Popular News (Last 30 Days)