Bengkang chinna a hmalakna tur tlangzarh

High Powered Committee Lunglei leh Agriculture Department tangkawpa Bekang chin kawnga hmalakna tur Project, Intensive Cultivation of Soyabean chu nimin khan Lunglei-ah tlangzarh a ni.

Intensive Cultivation of Soyabean tlangzarhna hun hi Agriculture Conference Hall Lunglei-ah neiin HPC Vice Chairman, Lawmawma Tochhawng MLA chuan a tlangzarh a, Mizo Bekang tharchhuah chi ngei Mizo bawkin an ching tur chu lawmawm a tih thu sawiin, Thlai chi leh thil dang dawngtute chu khawtlang leh District in a chhawr ngei theihna tura Pathian tanpuina nen theihtawp chhuah turin a sawm a, Bengkang chi leh a enkawlzuina tur thil pawimawh hrang hrangte Bekang ching tura thlan te hnenah a sem nghal bawk.

Lunglei DAO C. Malsawmkima kaihhruai he hunah hian Baby Lalremkimi, ADAO chuan an hmalakna te tarlangin, Lunglei District chhunga Bekang chinna tur chu Hectare 25 a zau a nih thu leh khaw thlan bik Dawn, Buarpui leh Kawlhawk atangin loneitu mi 100 thlanchhuah an nih thu a sawi a, anni hian Bekang chi, Sprayer leh hnim hlo bakah leitha dawngin a hlawhtlin ngei theih nan Department lam thawktute pawhin ngawrh zawk a vil an tum thu a sawi a ni. He hunah hian Bekang chu chakna pai tam, mihring tana chaw tha a nih avangin tam zawk tharchhuah a ni a, a chi a intodelh tura hmalak bakah lei da tawh tih that lehna hmanraw tha tak a nih avangin he hmalakna hi uar zawka kalpui tum a ni