Kanhmun (Mizoram) leh Damcherra (Tripura) inkalpawh theih dan tur ruahmanna siam a ni

Mizoram chhunga Kanhmun khua leh Tripura State-a Damcherra khua te chu inkalpawh phalna pek a ni.

Tunhnaiah Mizoram in Tripura atanga nitin mamawh a lakluh laia harsatna a thlen hnuah leh Mizoram Sawrkar Disaster Management & Rehabilitation Department in rem a tih angin Kanhmun (Mizoram) leh Damcherra (Tripura) chu inkalpawh phalna (Free Movement Permit) pek a ni tih nimin-a Mamit District Bawrhsap, Dr. Lalrozama thuchhuah chuan a tarlang a. He thuchhuah-a a tarlan danin heng khaw pahniha sumdawng leh mamawh lam te hi kar khatah Thawhtanni leh Zirtawpni-ah te zing dar 10:00 atanga chawhnu dar 2:00 thleng an inkalpawh thei dawn a ni.

Hemi hun chhung hian Damcherra atanga Bazar tura Kanhmun lo lut duhte chu mpass ngai lovin, Thermal Screening hmanga endik an ni anga, symtoms an neih chuan Rapid Antigen Test tih chauh tur a ni ang. Chawhnu dar 2:00 a ralhma ngeiin Damcherra-ah an kir leh tur a ni a, Kanhmun khaw chhung bak kal phal a ni lo anga. Kanhmun piahlam kal turte chu mpass-ah an in register hnuah Medical Screening kalphung pangngai an paltlang a ngai ang.

Kanhmun (Mizoram) atanga Damcherra (Tripura)-a Bazar turte chuan Kanhmun VLTF-ah phalna an la hmasa tur a ni a, Damcherra-a Bazar tur hian mi pakhat tan a rei berah darkar 2 hun pek an ni anga. Chutihrual chuan chawhnu dar 2:00 thleng hun pek an nih angin darkar 2 ala ral lo a nih pawhin chhun dar 2:00 rik hma ngeiin Kanhmun-ah an kir leh tur a ni.

He phalna hian ke a kalte chauh a huam dawn a. Hun bituk bawhchhia an awm chuan sawrkar dan dinglai angin Rs. 1,000/- chawitir an ni anga, pawisa chawi duhlo an awm a nih chuan thla 3 atanga kum 1 thleng lung In tan tir theih an ni ang. Kanhmun an rawn kir hnuah pawh hun bituk bawhchhia te chu Screening an paltlang hnuah Quarantine tur an ni ang a. Free Movement hun chhunga veivak te reng reng chuan COVID-19 Appropriate Behavior kaihruaina an zawm tlat tur a ni.