Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Aitlang-a huan nei ten an harsatna CM-ah an thlen

Vairengte Aitlang-a huan neitu mi 18 te chuan nimin khan Chief Minister Zoramthanga hnenah ziakin an harsatna te an thlen.

Aitlang, Vairengte hmuna huan neitute chuan June 29, 2021-a Assam sawrkar tirh Assam Police thahnem tak ten hun rei tak chhung an lo cheibawl tawh, an innghahna leh eizawn nana an hman mek chu rawn hnehchhuhin an ram chhung ngeiah Police Camp te siamin an rawn in bengbel tih sawiin, Assam Police in an ram an laksak zat hi Tin 80 leh a chanve vel a zau, kumtin Rs. 2,000,000/- chuang man thlai an tharchhuah ve thin thu leh an thlai thar rah hi kum telin a man a tam ve tial tial thu an sawi a.

Kum 50 chuang zet an lo enkawl tawh, Mizoram chhung ngei ami ni si, hetia Assam lamin an rawn hnehchhuh mai leh an thlai te an rawn suasam chiam mai chu mak an tih thu leh hriatthiam harsa an tih thu Chief Minister hnenah hian thlenin, an ram chin humhalh tura Mizoram sawrkar lam atanga hmalakna a awm thuai loh chuan anni bakah helai chhehvela huan leh Dil neitu tam takte pawh hian an chan chho zel mai ang tih a hlauhawm takzet tih an sawi a, an harsatna leh manganna te hriat saka hma lakpui turin Chief Minister chu an ngen a ni.

Comments

Chhiar Hlawhte