Assam Police Silai mu tuar thatchhuah thuai beisei

July 26, 2021-a Assam leh Mizoram Police te inkahna thlenga Mizoram lama hliam tuar Vairengte tlangval chu a thatchhuah leh thuai beisei a ni.

Inrinni kaltaa Health Minister hova sawrkar mi pawimawh te thutkhawm ah July ni 26, 2021 tlai lama Vairengte daia Assam Police in an kah hliam Vairengte tlangval kum 20 mi dinhmun tarlan a ni a, kah hliam a nih veleh hian rang takin Vairengte PHC-ah hruai nghal a ni a, a hliam a lo nasat deuh vangin Kolasib District Hospital-ah hruai nghal niin hemi zan la la hian Kolasib District Hospital-ah zai nghal a ni a, silaimu hi a malpui dinglamah lutin a malpui vei lamah a tlang a, a malpui veilam ah hian silaimu hi a tang nghe nghe a ni.

A malpui dinglam ah hian thisen zam pawimawh (femoral artery) kahchhiat a ni a, hei hi siamthat a ni a, Kah hliam a nih hian thisen a hloh hnem avangin thisen Unit 8 pek niin a hliam hi enkawl zui ngai nia hriat a nih vangin Civil Hospital, Aizawl-ah July 27, 2021 khan lak chhoh a ni a, Health & Family Welfare Board Vice Chairman, Dr. ZR. Thiamsanga hovin Senior Doctor te inrawnkhawmin, Phai lam Centre lian a Vascular Surgeon 3 lai rawn bawkin uluk takin enkawl dan tur an sawiho a ni a. Doctor 3 awmna, Team of Surgeon dinin Zirtawpni khan anni hian a malpui dinglam chu zai hawng lehin silaimu in a tihchhiat, femoral artery hnawhtu thisen khang hlawm chu an la chhhuak a, damdawi hmanga an thuahfai hnuah uluk takin an khawih leh a ni. Hetia an khawih hnu hian a hmaa thisen khangin a hnawh vanga a malpui-a marphu awm tawh lo kha tha takin a awm leh ta a, damlo pawh hi a thatchhuah leh thuai beisei niin a malpui vei lama silaimu tang pawh hi lakchhuah nghal a ni.