AMC Area-ah Total Lockdown kalpui leh a ni

COVID-19 hri leng avanga Aizawl Municipal Corporation (AMC) huamchhunga Total Lockdown kalpui mek chu kar khat dang, August 7, 2021 zanlai dar 12:00 thleng pawhsei leh a ni.

Inrinni khan Health Minister Dr. R. Lalthangliana hovin Mizoram-a COVID-19 hripui leng mek dinhmun thlira thutkhawm chu SAD Conference Hall-ah neih a ni a, he hunah hian hri leng meka Mizoram dinhmun leh a bikin Aizawl dinhmun an thlirin hri leng inkaichhawnna in a vawr tawp a thlen mek laia inthlahdul chu a rem rihlo ah an ngai a, hetih rual hian Sample Test runpui neih mek pawh ngawrh taka kalpui chhunzawm tha an ti a ni.

Meeting-ah hian sawrkar laipui lama H&FW Ministry hotute chuan sample test zat atanga hri inkaichhawnna (positivity rate) 10% (za ah sawm) aia sang a nihna District-ah chuan khauh taka inkaihhruaina kalpui tur a ni tih an sawi thu tarlan a ni bawk.

Mizoram Police Aizawl khawpui huamchhunga duty te chu ramri lamah thawn deuh vek an nih avangin Total Lockdown kalpui chhunzawm chhung hian LLTF te leh YMA te chu theihtawp chhuaha ngawrh taka duty chhunzawm tura ngen an ni a, kan zavaia kan him tlanna tura ruahman a nih vangin mipuite chu karkhat dang lo insangmar leh hram hram tura ngenin, COVID Appropriate Behaviour (CAB) zawm chunga sawrkar ruahmanna te tha taka thlawp turin an ngen bawk a ni.

He thutkhawm ah hian Health Minister Dr. R. Lalthangliana chuan ICMR hotute hnenah RT-PCR Test Kit leh a bawlhlote Mizoram tana rawn pe leh tura a ngen thu sawiin, ICMR lam chuan RT-PCR Test kit 20000 bakah a bawlhlo Viral Transport Medium (VTM) leh RNA Extraction Kit 20000 ve ve, a vaiin cheng vbc. 5 man hu vel chu a thlawna an rawn pek tur thu hrilhin, tunkar hian a rawn thlen hman beisei a nih thu a sawi bawk.

Rapid Antigen Test kit chungchangah thlaphanna tur a awm loh thu pawh he hunah hian sawi niin, nuai khat lo thleng tur a awm bakah nuai 2 dang pawh Order fel tawh a nih thu tarlan a ni a, RAgT Kit man a tlakhniam zel avangin RAgT hmanga Sample Test man pawh Rs. 100/- ah tihhniam a nih tur thu sawi a ni.

Hetianga AMC huamchhunga Total Lockdown kalpui leh tura ruahman a nih avang hian hemi hun chhunga inkaihhruaina dan leh AMC Area pawn lama kalpui dan tur chu State Executive Committee on State Disaster Management Authority in an ruahman ang a, Chief Minister-in a pawmpui chuan hman a ni ang. He thutkhawm ah hian sawrkar mi pawimawh te leh Kohhran, NGO leh Local task Force aiawhte pawh an tel bawk a ni.