Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Zirlaibu sem tur tifel

Hripui leng avangin School kal theih rihlo mahse,sikul naupangten mahni In lamah zirna an chhunzawm theih nan Textbook sem thuai tum niin Inrinni khan zirlaibute hi District hrang hrang ah phurh thlen a ni. Samagra Shiksha hnuaiah heng zirlaibu te hi a thlawnin sem a ni leh dawn a, Elementary School zirlai Class VIII chin hnuailam tan zirlaibute hi sem a ni leh dawn a ni. Heng zirlaibute hi sawrkar enkawl School naupangte hnenah a hma thei ang berin semchhuah a ni dawn a, zirtirtute chu zirlaibu an semchhuah kawngah hrileng laka himna ngai pawimawh tura beisei an ni. Zirlaibute hi Class I-V tan naupang pakhat zelah Rs. 250 man leh Class VI-VIII tan Rs. 400 man pek an ni dawn a. Naupang pakhat zel tana sanction zat hian Class V hnuailam chu an zirlaibu a daih thei a, class VI-VIII erawh chu zirlaibu a to deuh tawh a, an Main Subject pek an ni ang.


Total Lockdown pawhsei a ni

Mizoram chhungah COVID-19 dona atan hun rei tak lockdown kalpui a nih hnuah hriin kiam lam a pan theih rih loh avangin tukin dar 4:00-a Total Lockdown tawp tur chu Mizoram sawrkar chuan inkhuahkhirhna kalpui chhun-zawm tha a ti a, hemi atan hian inkaihhruaina thar pawh Inrinni khan tihchhuah niin June 7, 2021 zing dar 4:00 thleng inkhuahkhirhna hi kalpui a ni leh dawn a. AMC Area huam chin pawn lamah chuan Deputy Commissioner/ DDMA ten an District dinhmun te uluk taka zirchiangin District chhungah inkhuahkirhna siamin an kalpui tawh dawn thung a ni.


Thenzawl inkharkhip dawn

COVID-19 hri leng mek dinhmun thlirin nimin khan Thenzawl Town Task Force te chu Thenzawl-a Vantawng Group YMA Run-ah an thukhawm a, chawlhkar khat chhung khauh taka inkhuahkhirhna kalpui chhunzawm relin Then-zawl Venghlun-a Industry Complex chu 4C atan hman nise an ti a, MGNREGS inhlawhna sum sem mai theih pawh la sem rihloh nise an ti bawk.


Hri danna pek pung zel

Inrinni thleng khan Mizoram-ah mi 2,56,741 te hnenah COVID-19 Vaccine Dose 1-na pek ni tawhin an zinga mi 52,067 te chu Dose 2-na pek an ni tawh bawk. Mizoram-a Vaccine pek te zinga 15,528 te chu Healthcare Workers niin 32,453 te chu Frontline Workers an ni a, kum 60 chunglam 58,221, kum 45-59 mi1,34,096 leh kum 18-45 mi 16,443 te pek an ni tawh bawk a ni.


Kawmhnaih te sawi hreh vangin harsatna thleng

Health Minister Dr. R. Lalthangliana hova COVID-19 hripui kai dinhmun a hniam theihloh chhan sawihona Inrinni-a neih ah hri kaite'n an kawmhnaih te an puang hreh thin chu a bulpui pakhat niin an sawi. Inrinni khan Health Minister ho hian SAD Conference Hall-ah COVID-19 hri kai hnu chhui chungchang sawihona hi neih a ni a, he hunah hian Police Contact Tracing Team-in hma an lakdan tarlangin, Contact Tracing Team in harsatna an tawh lian ber leh hnu-chhui kawngah hmalak ti harsa bertu ni a an sawi chu hrikai hmuhchhuah thar zinga tam takin an hnim-hnaihte an puang hreh thin chu a ni a, midangte hek ni a inngai an awm tlat avanga an zep tlat thin chuan harsatna a siam nasa hle tih an tarlang a, midangte an lo him zel zawk nan an hnimhnaihte tha takin sawi thin se an duh thu sawiin, hemi chungchangah hian ruahmanna uluk taka siam a tul thu sawi a ni bawk.

Inkharkhip chhunga hri kaite hnu chhui atanga an hmuhchhuah pakhat chu chhungkua a inkaichhawng an tam bakah, a ruka chhungkhat laina te intlawh, thian thate leh thenawm hnai inlen-pawh atanga hri kai an la tam tih a ni a. Mipuite chu an himna tur a ni tih hria a inlenpawh kawngah insum hram hram turin an ngen bawk.


Vaccine thlen hun nghah ngai

Mizoram-ah kum 18-44 inkarte COVID-19 vaccine pek chhunzawm mek a ni a, Mizoram sawrkar chuan a thawhkhatna ah Dose 16,340 leiin Priority Groups te pek hmasak an ni a. Tunah hian Dose 600 vel la awmin hei hi Vawiin hian Aizawl-ah pek chhunzawm leh a ni dawn a, tun tumah hian coWIN atanga registration leh booking ti lâwk te chauhin an la thei dawn a ni. Hei bak chu vaccine lo thlen leh hun nghah leh hlek a ngai rih dawn tih sawrkar thuchhuah chuan a tarlang bawk.

Comments

Chhiar Hlawhte