ZPM Party in Dawnfawh thartute an chhuang

ZPM Party chuan Mizoram-a hlawhtling taka Dawnfawh thartute chu an chhuang tih sawiin, Mizoram thar ngei Dawnfawh chu tlawmngaia leisak turin Mizo mipuite an ngen bawk.

Nimin a thuchhuah an siamah ZPM Party chuan Lengteng bial Ngopa, Lamzawl leh Pawlrang khuaa chhungkaw engemawzat in Tuiphal leh Tuithil leilet-h hlawhtling taka Dawnfawh an thar chu an lawmpui thu sawiin, Serchhip Mat phai-ah pawh kumin hian a enchhinna neiin engemaw zat tharchhuah a nih thu leh hetiang zawnga hmasawnna chu lawmawm an tih thu an sawi a ni.

ZPM chuan Mizoram tharchhuah ngei mai Dawnfawh han hmuh hian rilru a tihlim hle nia sawiin, a ti tak tak tute tan chuan Mizoram-ah hlawhtlinna a awm a ni tih pawh an lantir chiang hle niin an sawi a. A hralh hunlai tak hi Lockdown lai a nih avangin tihralna lama harsatna an tawk chu pawi an tih thu leh Lengteng bialtu MLA, L. Thangmawia leh Sawrkar Department lamin a hralhna kawngah theihtawp an chhuahpui a ni tih an hriat an lawm thu leh Mizoram thar ngei Dawnfawh tlawmngaia lo leisak turin Mizo mipuite an ngen a ni. ZPM Policy lian ber chu rim taka hnathawk mekte khaichhuahna turin a theih chin chin a ke pen a ni tih pawh sawiin, Mizoram ei leh bar-a kan intodelh theihna tur leh kuthnathawka eizawng ten anmahni kut ngeia an dinchhuah theihna tur tuipui a, puih an ngaih hun a pui a, kaih an ngaih pawha kai thei tura sawrkar inbuatsaih, ban-a kaih (hand holding) policy a nih thu an sawi bawk.