Latest News

Hri leng avanga inkharkhipna kalpui mek May 24, 2021 thleng atan pawhsei a ni

Mizoram sawrkar chuan COVID-19 hri leng avanga inkharkhipna kalpui mek chu Mizoram chhunga COVID-19 kai thar chak taka an pun zel avangin leh a vei mek thahnem tak an awm zui zel avangin May 24, 2021 zing dar 4:00 thleng atan Lockdown hi kalpui chhunzawm tura tih a ni.

Mizoram State Disaster Management Authority-a State Executive Committee Chairman leh Mizoram Chief Secretary, Lalnunmawia Chuaungo chuan ‘Total Lockdown’ kalpui mek chhunzawmna tur a nih thu hi nimin khan thuchhuah siama tarlangin, Mizoram State Disaster Management Authority chuan nimin khan inkaihhruaina thar a tichhuak nghal bawk a. Inkaihhruaina thar ah hian Mizoram-a lut turte reng reng chu Sawrkar in a hawn mek Entry Points kaltlang chauhvin an lut thei anga, Mizoram-a lo lut tur te chuan mPass-ah an in-register ngei tur a ni a, India rampawn leh India ram hmun dang atanga Mizoram-a lo lut reng reng chu Mizoram an lo luhna (Point of entry)-ah Rapid Antigen Test (RAgT) hmanga endik vek an ni anga, a hma ami ang bawkin Quarantine pawh kalpui chhunzawm tur niin inkhunghran chhung hian symptoms an nei a nih chuan RT-PCR/TrueNat hmanga test an ni anga, Symptoms neilo te chu test an ngai lovang.

Mipui inkaihhruaina ah AMC Area leh District Hqrs. ah te inkhuahkhirhna hun chhung hian tumahin mahni In/Compound an chhuahsan tur a ni lova, building khata In hrang hrang luahte pawh intlawhpawh loh tur a ni a, hmundang ah pawh eizawnna leh tul bik thil nilova veivah leh inlenpawh khap tlat a ni tawh dawn bawk a. AMC leh District Hqrs. ni lo hmun dangah pawh Sawrkar Office, Bank, etc. chu COVID-19 Appropriate Behaviour (CAB) tha taka zawm chungin an kal ang.

Zirna In leh Sakhaw biakna hmun te chu khar chhunzawm tur niin Vantlang hmun hrang hrang leh intihhlimna hmun te pawh khar zui zel a ni dawn a, Inneihna leh reception bakah Mitthi vuinaah mi 30 aia tam punkhawm phal ni lovin Chhiatni/thatni leh puipunna dang reng rengah ei leh in sem/siam phal a nih loh bakah mipui punkhawmna dang te pawh neih khap chhunzawm ala ni dawn bawk a ni.

Eichawp dawr leh Thlai, chawhmeh leh sa zawrhna te chu Thawhlehni leh Zirtawpni-ah hawn theih an ni anga, heng dawr/thil zawrhna hmuna bungraw sem turte chuan LLTF/VLTF te hriatpuinain Thawhtanni leh Ningani zan dar 8:00 atanga zanlai dar 12:00 inkarah an mamawh te an la/sem thei ang. Bazar hawn ni hian chawhmeh lei tura Motor-a chhuah khap a ni a, Veng danga chawhmeh ilo lei tura kal a ngaih loh nan LLTF/VLTF tin ten anmahni Veng chhungah chawhmeh zawrhna tur ruahmanna an siam anga. Chawhmeh Bazar leh dawr te hi tlai dar 5:00-ah khar ngei ngei tur niin tlai dar 5:00 pelh hnuah tumah Bazar kal tura chhuahvah phal a ni lo ang.

AMC Area leh District Hqrs. ah te mahni In/compound chhunga hnathawktu leh hmanraw awmsa te hmangin hna thawh phal a ni a, hmun-dang atanga hnathawktu leh hmanrua leh bungrua lakluh phal a ni lova. Lo neitu leh huan neitute, ran vulhtute, Sangha Dil neitu te leh a thawktute chu phalna hranpa lak ngai lovin an hna thawh phalsak an ni a, Lo/huan-a hna thawk tura ram riah pawh phal a ni. Hmun khata mi 5 aia tam awm-khawm erawh chu khap a ni.

Lo/huana kal/feh turte chuan zing dar 8:00 hmain khawchhung (City/Town area) an chhuahsan hman tur a ni a, tlai dar 5:00 hmaa an rawn luh leh phal a ni lova, Police/COVID-19 Executive Duty-te enfiah theih turin VLTF/LLTF te phalna lehkha emaw, an kalna tur Lo/huan an nei ngei a ni tih lantirna document (LSC, periodic patta, adt.) an keng ngei tur a ni.

Comments

Chhiar Hlawhte