PM-KISAN sawihona hun hman a ni

Ramchhunga loneituten an hnathawhna tur leh thildang pawimawh atana an hman tur loneitu pakhat in kum khata Rs. 6000 an dawn ziah theihna tura Sawrkar laipuiin a duan chhuah, Pradhan Mantri Kisan Samman Nidhi (PM-KISAN) chungchang sawihona chu nimin khan Prime Minister hovin neih a ni a, Mizoram atangin Chief Minister aiawhin Agriculture Minister, C. Lalrinsanga a tel a ni.

Video Conference hmanga he sawihona hunah hian Agriculture Minister, C. Lalrinsanga chuan PM-KISAN hnuaiah hian Mizoram kuthnathawktu mi 1,90,002 ziahluh tawh niin, chung zinga 1,49,933 te chuan he hamthatna zar hi zo tawhin pawisa cheng vbc. 126 chuang lai an Bank Account-ah chhunluh tawh a ni tih a sawi a. He Scheme hnuaia Loneitute tanpuina hi thla 4 dan zelah kum khatah Installment 3-a pek chhuah thin a ni a, Installment khatah Rs. 2,000/- zela pek a ni a, inziaklut hmasa te chuan Installment 7-na thlengin tanpuina sum hi an dawng tawh a ni.

PM-KISAN hnuaiah hian chhungkuaa member pakhat chauh hminga hamthatna hi dawn tur a ni a, chhungkaw thenkhat atanga hming pakhat aia tam inziak lut te chu endiknaah paih theih an ni.