ZMC-ah Khum awl hman lo

Mizoram-ah COVID-19 hri kai an pun zel avangin ZMC-SRHF ah damlo tan Khum a awl hman meuh lo.

Zoram Medical College-State Referral Hospital hi damlo dang dah lova CO-VID-19 hri kai te chauh enkawlna hmun atana ruahman a nih hnuah Ward hrang hrangte chu siamrem zel a nih thu ZMC Director, Dr. John Zohmingthanga chuan a sawi a. Ward an hawn belh zel hnuah tunah hian hri kai te enkawl mekte tan Khum 244 vel awm mah se, damlo khum awl a awm hman mang lo tih sawiin, “Bed occupancy an tih angin engtik lai pawhin damlo khum zaa 85 atanga 90 hi a khat reng a ni,” a ti.

ZMC Director Dr. Zohmingthanga chuan, ni khat thil thuah COVID-19 hri kai thar mi 200 chuang lawih te-a a pun zel avangin, khum indaihlohna pawh a sang chho ve zel lo thei lo niin a sawi a. Ward siam belh zel hi thil hautak tak ni mah se, sawrkar nen tangho a tihzauh belh tumna erawh a awm reng niin a sawi.

Kar kalta khan Health Minister Dr. R. Lalthangliana chuan ZMC-ah hian Oxygen siam chhuahna khawl chu bunfel a nih tawh thu leh hlawhtling taka enchhin a nih tawh thu a lo puang tawh a. He Oxygen Generating Plant hmangin Oxygen 200LPM siamchhuah theih a ni a, heng te nena tangkawpin engemaw chen damlo enkawlna atan hian mamawh a chhawk zangkhai nasa hle tih ZMC Director chuan a sawi a, “Tunah hian ZMC-ah Oxygen hmankhawp kan la nei ve hram hram a. A chhan chu Oxygen Generator khawl leh Jumbo Oxygen Cylinder bakah a bur te te nen kan la inenkawl thei a ni,” a ti.

ZMC-SRHF Bulletin in a tarlan danin nimin khan ZMC-SRHF Covid Ward hrang hrang ah hri kai admit thar 16 an awm a, ICU/ICU Extension-ah admit thar pakhat awmin, Ward atanga damlo pahnih sawnluh an ni a. ICU damlo 31 zinga 20 te ventilator hmanga enkawl an ni.