COVID-19 vanga College leh University zirlaite harsatna tawh chungchang sawiho a ni

COVID-19 hripui len vanga Mizoram chhunga College leh University zirlaite harsatna tawh chungchang sawihona chu nimin khan Higher & Technical Education Minister Dr R. Lalthangliana hovin neih a ni.

SAD Conference Hall-a he sawihona hunah hian COVID-19 hri leng vanga rei tak Regular Class kalpui theih a nih tawh loh avanga Online Class kalpui thin a nih thu sawilan niin, College leh University zirlaite ten kumtin an chawi thin Fee pangngai chi hrang hrang piah lamah Online Class kalpui nan Internet Data manah an insenso nasat avanga harsatna an tawh chu uluk taka sawiho a ni a, Commissioner & Secretary, Higher & Technical hovin uluk taka a rang thei ang bera zirlaite tana zangkhai thei tur anga ruahmanna siam nise an ti a ni.

Online Class kalpui chungchanga harsatna chi hrang hrang zirlaite leh leh zirtirtu ten an tawh, a bik takin Internet Connection leh Power supply chungchang pawh sawiho niin, Telecom Sector hi Central subject a nih avanga State sawrkar tan duh anga hmalak chak a har thu tarlan a ni a, a bik takin NH-54 laih zauh hna thawh a nih avanga Optical Fibre hmun tak taka tih chah a nih vanga Internet Connection in a tawrh thu te, Power Supply mumal loh avanga Mobile Tower in an tawrh thute tarlan a ni a, a theih ang anga hmalak dan dap nise an ti a. COVID-19 Task Force on Mobile & Internet Services sawrkarin a din thar dawn thu leh hriattirna pawh tihchhuah a nih beisei thu sawilan niin, anni pawh theihtawp chhuah tura ngen nise an ti a ni.

He Meeting-ah hian zirlai lehkha zir lo thei lo, zir mumal hleithei si lova an awm chu an khawngaihthlak thu leh an rilru leh ngaihtuahna thlenga an tawrh thu sawichhuah niin, a bik takin zirlaite an khuaa an haw darh hnuah Internet Connection leh Power Supply mumal lohna hmun tam tak a mi ten Online Class kalpui chungchangah harsatna an tawk tih sawilan a ni a, hemi atan hian ruahmanna awmze nei deuh hlek siam a, a tul anga State Executive Committee on State Disaster Management hnenah hmalak sak tura thlen nise an ti a. COVID-19 Second Wave boruak hetiang a nih tawh rual hian Third Wave lo la thleng tur nia mithiamten an sawi avangin hmalam hun thui tak thlir chunga ruahmanna siam a tul an tih thu an sawi bawk.

He hunah hian H&TE Department aiawhte, MZU thuneitute, ICT Department, P&E Department leh College Zirtirtu leh MZU aiawhte pawh an tel a, Online-based Learning Management System siam a pawimawh thu tarlan niin hemi chungchanga hmalak theih dan leh a ruahman dan turte Lalthlamuana, Chief Informatics Officer-in a sawifiah a, Meeting kaihruaitu Minister chuan a bawhzui turin Committee an din vat dawn tih a sawi nghal a ni.