SBI Foundation kaltlangin PPE Full Set 600 hlan

SBI Foundation chuan COVID-19 hripui leng dona hmanraw pawimawh tak, Personal Protective Equipment (PPE) full set 600, Rs. 8,61,000/- man hu chu nimin khan Mizoram sawrkar hnenah an hlan.

Heng PPE te hi Health Minister Dr. R. Lalthangliana hnenah SBI Foundation aiawhin SBI Regional Manager, LP. Lalchangkima leh a thawhpui ten MINECO tual-ah an hlan a, he hunah hian Health Minister Dr. R. Lalthangliana chuan SBI Foundation leh SBI te inpekna chu fakin, “Kan mamawh hun lai tak zela an rawn che thin hi a ropuiin a lawmawm takzet a ni,” a ti. COVID-19 hripui leng dona kawngah harsatna tam tak kan hriat ngai loh leh beisei ngai loh kan tawng tih pawh sawiin, “Hetiang boruak kara Kohhran, Pawl leh mimal inphalte zara thilpek kan dawng thin hi a lawmawmin, he hripui dona kawnga thawktute pawh chakna thar min pe thin a ni,” a ti bawk.

He hunah hian SBI Regional Manager, LP. Lalchangkima chuan PPE hi SBI malsawmna dang, SBI Foundation kaltlanga pek a nih thu a sawi a. Mizoram-in a mamawh nia an hriat ICU khum 100 lai chu Central YMA nen tangkawpin SBI Foundation-ah hian an dil mek thu a sawi bawk.

SBI Foundation hi India ram pumah SBI hnathawkten an phal anga sum an thawh atanga din niin, ram pumah thilpek an lo hlan tawh thin a, tun tuma PPE Set 600 an hlan hi Full Set niin Face Mask, Face Shield, Mit venna Goggles, Hand Gloves, Pheikhawk tuamna, Lu tuamna, suit leh a paihna tur (bag) a chhawm a, set khat Rs. 1435/- man a ni.