Tui tlem leh khawlum lutuk avangin Mat Phai-a Sangha Dil nei ten harsatna an tawk

Kumin Thal chhunga ruahtui a tlak mumal loh avangin Serchhip Mat phai-a Sangha khawitu thenkhat te chuan harsatna tawkin an Sangha khawi puitling tawh thahnem tak thiin tam tak a hun hmaa man a awm bawk.

Serchhip District Fish Farmers Association President, Hmangaihthanga hnen atanga thu kan dawn danin kumin hian Thal a nat avang leh khawlum avangin tunhnaiah an member thenkhat te chuan harsatna nasa tak an tawk tih a sawi a, kumin-a Thal a nat avang hian boruak lum lutuk avanga Sangha Dil-a tui te lumin tui a tlem bawk si avangin Sangha khawitu thenkhat te Sangha chu a thi nasa hle tih a sawi a, hetianga Sangha a thih nasat avang hian Sangha la thi lo te pawh thahnem tak manin a tihralna tur a theih ang anga an dap thu a sawi bawk a, a bik takin Mualvawm, Zehtet leh Thuhruk lui ring-a Sangha khawitute chuan harsatna hi an tawk nasa a ni. SDFFA President chuan hetianga harsatna an tawh chungchangah hian sawrkar atangin hmalakna engmah a awm rihlo nia an hriat thu a sawi a, Vawiin lam khan harsatna tawk te hi in report tura tih an nih thu leh hemi ang hian harsatna tawk te pawh hi an hming lakkhawm a nih dawn thu a sawi bawk.

Serchhip District Fish Farmers Association chhinchhiah danin khawlum avanga harsatna tawk nasa ber Hmangaihthanga, Zozam Veng te chu an Sangha kg. 200 vel zet an man a, Lalramliana (CMS) te Sangha kg. 100 vel manin Laldawngliana Sailo (Medical Quarters) leh C. Zokunga (Tuikhuah Veng) te Sangha Kg. 80 vel ve ve a thi bawk a. PC. Laltlansanga (Hmar Veng) chuan Kg. 50 vel an man bakah hralh tlak loh kg. 30 vel zet an nei tih an sawi a, K. Laldaihvela (Bazar Veng) te Sangha kg. 50 vel manin heng bakah hian a zat hriatchian chiahloh zingah PC. Vanlalsawma (Venglai), Robert L. Hnamte (Saron Veng) leh Saizampuia Sailo (Medical Quarters) te Sangha pawh thahnem tak a awm bawl tih an sawi bawk a, heng bakah hian Association-a in hriattir lemlo harsatna tawk pawh engemaw zat an awm an rin thu an sawi bawk.

Heng harsatna tawk thenkhat te hi nimin khan kan Palai chuan an Dil neihna hmunah kawmin harsatna an tawh dan te a zawtfiah a. Sangha Dil enkawltu thenkhat te chuan nikum lama Zehtet leh Thuhruk ram chu nasa taka a lo kan tawh thu sawiin, kumin ah pawh helai ah hian ramkang a nasat leh avangin Tuihna a tlem phah hle tih an sawi a. Sangha Dil neitu pakhat chuan Tuihna tlem chu an harsatna lian ber pakhat a nih rualin Sangha Dil nei an pun zel laia Tuihna pung ve tawh si lo chu harsatna lian zawk thlentu a nih thu a sawi bawk a ni.