Chanchin thar thenkhat :

June 3-ah HSLC result

Kumin a pawl 10, HSLC Exam result chu thla thar June 3 khian tihchhuah tum a ni. Mizo-ram Board of School Education (MBSE) Chairman, JH. Zoremthanga chuan India ram hmun dangte hrileng avanga an buai viau laiin HSLC leh HSSLC Examination chu ruahman lawk angin an kalpui theih thu leh, result pawh a hun takah tihchhuah theih an tum tih nimin khan a sawi a. HSLC Exam result chu June 3, 2021 (Thursday)-ah tihchhuah tum a ni tih sawiin, HSSLC result chu June chawlhkar thumnaah tihchhuah tum a ni, a ti bawk. Result hi MBSE-ah tarchhuak lovin MBSE website-ah en nghal theih a ni dawn a, MBSE Office kawt leh a velah Result bu lei theih a ni dawn a. Exam Centre Superintendent leh DEO tinte hnenah pdf-a pek chhuah a nih dawn bakah Phone-a zawhna tur siam a ni bawk ang.

Luidung nungcha humhalh rel

Nimin khan Mizoram Chief Secretary hovin Law & Judicial Department, Central YMA hruai-tute leh Fisheries Department hotute chu thu-khawmin luidung nungchate humhalh chungchang leh dan lova Sangha man thin te titawp tura Central YMA leh Fisheries Department thawhho thuai a tul zia te sawiho in thawhhona thuthlung turte an duang nghal a. Sangha bakah Chakai leh Chengkawl te pawh la puitling lo, te tak tak man leh zuar an awm thin thu pawh sawiho niin, hetianga Sangha, Chakai leh Chengkawl la puitling lo man leh zuar te chu dan anga man a hremna pek zel tawh turin an rel a ni bawk.

Ruihhlo ngai zinga hri kai te enkawlna tur ruahman

Nimin khan Social Welfare Minister, Dr. K. Beichhua hovin ruihhlo ngai, COVID-19 hri kaite enkawl dan tur sawihona neih niin Jordan Centre, Sethawn chu ruihhlo ngai, COVID-19 hri kaite enkawlna atan ruahman a ni a, hemi chungchangah hian Health Department leh Kolasib DC te nena ruahman siam thuai tura tih a ni. SAD Conference Hall-a thutkhawm ah hian SWD Minister chuan damlo dangte nena ruihhlo ngai COVID-19 hri kai te chu hmun khata enkawl theih a nih loh thu a sawi bawk.

Jordan Centre hi Covid Care Centre (CCC) atan hman mek niin, Kolasib District hian COVID-19 vei mi 180 vel an enkawl mek a, heng mite enkawl chhunzawmna atan nikum lama CCC atana an lo hman tawh, Thingdawla Polytechnic chu hawn leh ni se an tih bakah, pian-phunga rualbanlo, COVID-19 veite atana ruahmanna tha zawk siamsak dan turte leh COVID-19 hri danna pek chungchanga ruahmanna siamsak dan turte pawh he thutkhawm ah hian sawiho a ni bawk.

Vawk hri lenna ah puang

Tunhnaia Zokhawthar khua a Vawk thahnem tak thi chu African Swine Fever vanga thi an ni tih finfiah a ni a, hei vang hian Zokhawthar hi Vawk hri lenna hmun, Infected Area-ah puan niin he khua atanga Vawk lakchhuah emaw, lakluh emaw leh Vawk talh leh a sa zawrh te khap a ni bawk.

Mizoram sawrkar phut

Serlui Youth Block Congress Committee chuan hnamdang Driver ten COVID-19 hri Zoram mipuite ah an putdarh loh nan leh kan him tlân zâwk theih nan Vairengte Sreening Point-ah RAgT paltlang ngeia luhtir tawh turin Mizoram Sawrkar an phut thu an sawi.

Zodintluanga’n hmanrua pe

Civil Hospital Lunglei-a RT-PCR bun tanna tur atana hmanraw mamawh hmasa chi hrang hrangte nimin khan Hospital thuneitute hnenah Thorang bialtu MLA Zodintluanga chuan a hlan. Nikum-a Lunglei leh chhim lam tana hman tang-kai tura COVID-19 sample test-na khawl RT-PCR a hlan chu sawrkarin Civil Hospital Lunglei Laboratory-ah a dah avang leh an hmang dawn nia a hriat avanga lawmawm a tih thu Zodin-tluanga chuan sawiin, heng a thil pek te hi RT-PCR khawlin a mamawh hmasak turte a ni tih a sawi a. “Tuna kan rawn ken pheite hi 'Manual' RNA Extractor hman a nih chuan CO-VID-19 hri enna atana rintlak ber Gold Standard RT-PCR khawl hi Civil Hospital Lunglei-ah hian hman chhoh ve theih a ni tawh ang a, Laboratory changtlung din a nih meuh chuan RT-PCR hi duhthusama thain 'run' theih beisei a ni,” a ti bawk.