Thal chhungin Thenzawl DFO huamchhungah kangmei vangin ramngaw tam tak a kangchhia

Kumin-a Thal chhung, thla thum kalta chhung khan Thenzawl Forest Division huamchhung ah tlangram, lui tui awm tir thei ram Hactare 305.1-a zau chu ramkang vanga kangchhia in, kangmei avangin hnathawktu zingah hliam tuar leh nunna chan an awmlo thung.

Kumin Thal chhunga Thenzawl DFO hnuaia ramkang leh hemi in a kanchhiat hrang hrang report-a tarlan a nih danin tunhnai thla thum kalta chhung Thenzawl DFO huamchhunga ramkang ah hian tlangram ramngaw, lui tui awm tirtu ber (Catchment Area) a kang nasa ber a, Hactare 305.1 chuang a zau kangchhia in, Thenzawl Division hnuaia Serchhip Range chhungah Thinglian, Hmunzawl, Zehtet leh Thuhruk-ah te kangmei hi a chhuak a, Thinglian leh Hmunzawl ram ah kangmei hi a chhuak nasa zual a, ram Hectare 200 chuang a zau kangchhia in, kangmei hi kar hnih chuang a chhuak a, ram kan chhan hi mi thenkhatin Khuai bu lak an tumna lama kangmei an tihchhuah vang a ni. Thinglian leh Hmunzawl vel ramkang-a thing leh mau kang chhia hlutzawng hi an chhutna, Net Present Value (NPV) anga chhutin cheng vbc. 18 chuang hu nia chhut a ni. April ni 24 khan Serchhip leh Thenzawl inkar, Thuhruk leh Zehtet ramah kangmei a chhuak a, helai hmun kan chhan hi leilet neitu pakhat in cha chheh a hal atangin a ni a, ram Hectare 25-a zau kangchhia in helai hmun a kangmei in a tihchhiat hlutzawng chu vbc. 1.65 hu nia chhut a ni bawk.

Heng bakah hian April 24 khan Chhingchhip Range-ah ram hectare 2.1-a zau kang bawkin kangmei chhuah chhan hi hriat a ni lova, he kangmei chhuak a kangchhia hlutzawng hi cheng nuai 17 hu nia chhut a ni bawk. Thenhlum Range-ah ram Hectare 20-a zau ah April 26 khan kangmei chhuak bawkin kangmei chhuah chhan hi hriat a ni lova, ram kangchhia hlutzawng hi nuai 131.4 nia chhut a ni. Bunghmun Range-ah Hectare 5-a zau ram a kang a, kangmei chhuahchhan hi hriat ni lovin thil kangchhia hlutzawng hi cheng nuai 42.25 hu nia chhut a nih bakah Sialsuk Range-ah March 10 khan ram hectare 28-a zau kangin cheng nuai 125 hu a kangchhia a, Lo hal atanga kangmei hi intan nia hriat a ni.

Catchment Area pawnlam ramngaw hmun dang ah pawh ram-kang engemaw zat tun Thal chhung khan a awm bawk a, Thenzawl Range huamchhungah Lungrang tlang leh Ngaizawl ram ah kangmei chhuak awmin, helai hmuna ramkang zau zawng hi Hectare 5 a ni a, cheng nuai 32.34 hu a kangchhia nia chhut a ni a. Thenhlum Range huamchhungah hmun hnih ah kangmei chhuakin hectare 5-a zau a kang a, cheng nuai 42.25 hu a kangchhia nia chhut niin Chhingchhip Range huamchhunga hmun hnih-a kangmei chhuak ah hectare 5-a zau kangchhia in cheng nuai 42.25 hu vel a kangchhia nia chhut a ni bawk a. Bunghmun Range-ah Hectare 7-a zau ah kangmei a chhuak bawkin cheng nuai 59 hu vel a kangchhia nia chhut a ni bawk.

Kumin Thal chhunga Kangmei chhuak avang hian Thenzawl Forest Division chhunga kawng kam-a Thingphun 25 a thi bawk nia chhinchhiah a ni a, Division huam chhunga kangmei chhuak hrang hrang avang hian mihring thi leh hliam chhin-chhiah an awmlo bawk a ni. Ramngaw kangchhia hlutna an chhutna, Net Present Value (NPV) hi Forest Conservation Act, 1980 Rules hnuaia sawrkar laipui in a siam a ni a, hemi ang hian ramngaw hi chi hrang hrangah then leh niin ramngaw that dan a zirin a hlutna hi a danglam ve zel a, Thenzawl DFO hnuaia ramngaw te hi a tlangpuiin Class-I, III leh V te a ni.

Tarlan tawh angin kumin a Serchhip District chhunga ramkang tam tak a awm avang hian thingtiak phun kawngah pawh nasa taka hmalak tum mek a ni bawk a. Thenzawl DFO hnuaia Range hrang hrangte pawh kumdang aia tingtiak tam zawk nei turin hriattir an lo ni tawh bawk a ni.