Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Mizoram-ah COVID-19 hri kai hmuh belh zel an ni

Niminpiah khan Mizoram-ah Sample 1622 enfiah niin COVID-19 hri kai 192 zet hmuhchhuah leh an ni a, Sample enfiah atanga za zela 11.90 te chuan hri an kai a ni.

Niminpiah khan ZMC Laboratory enkawltu zingah hri kai an awm avanga Laboratory tihfai a nih avangin Sample 45 chiah enfiah hman a ni a, heng atang hian hri kai mi 5 hmuh niin hri kai tawh nen inkawmhnaihna nei leh inkhunghrang lai te an ni.

District hrang hranga TrueNat Laboratory-ah Sample 171 enfiah niin hri kai mi 5 hmuh an ni bawk a, an zinga pathum chu Kolasib District ami niin hri kai tawh nen inkawmhnaih avanga In lama inkhunghrang lai an ni a, Aizawl District-ah hri kai pakhat hmuh niin Lunglei khua niin hri kaina hriatloh a ni a, Khawzawl District-ah State pawn atanga haw mi pakhat inkhunghrang lai chuan hri a kai tih hmuhchhuah a ni bawk.

Niminpiah khan Mizoram-ah Rapid Antigen Test hmangin Sample 1406 enfiah niin hri kai 182 hmuhchhuah an ni a, an zinga 152 te chu Aizawl District-a hri kai hmuhchhuah an ni a, heng zinga 82 te chu hri kai tawh nen inkawmhnaihna nei niin mi 68 te hi hri kaina hriatloh leh chhui ngai an ni a, State pawn atanga rawn haw mi 2 an awm bawk.

Kolasib District-ah hri kai 12 hmuh niin an vai hian Bairabi khua niin hri kai tawh nen inkawmhnaihna nei an ni a, Saitual District-ah hri kai mi 7 hmuh niin an zinga 6 chu Keifang khua niin hri kaina hriatloh pakhat a awm a, Tualbung-ah hri kai pakhat hmuh a ni bawk. Serchhip District-ah hri kai mi 4 hmuh niin Lawngtlai District-ah hri kai mi 4 hmuh an ni bawk a, Siaha District-ah hri kai 2 leh Mamit District-ah hri kai pakhat hmuh a ni bawk.

Nimin leh nizan khan Mizoram hmun hrang hrangah COVID-19 hri kai mi 136 te chu enkawl dam an ni ve leh bawk a, heti hian nizan dar 10:00 thlenga Mizoram-a hri kai hmuhchhuah chu 9444 niin an zinga 7407 te chu enkawl dam an ni tawh a, hei hi hri kai hmuhchhuah atanga chhutin za zela 78.43 niin tunah hian hri kai enkawllai 2007 an awm mek a, hri kai zingah nunna chan mi 30 an awm tawh bawk a ni.

Comments

Chhiar Hlawhte