State Research Unit on COVID-19 thukhawm

State Research Unit on COVID-19 chu nimin khan Health Minister, Dr. R. Lalthangliana hovin SAD Conference Hall-ah an thukhawm a, Chief Secretary Lalnunmawia Chuaungo pawhin a telpui a ni.

State Research Unit on COVID-19 hi tunhnaia sawrkarin Mizoram-a COVID-19 dinhmun kil tin atanga chik zawka Scientific Evidence nena zirchiang tura a ruat a ni a, nimin a thutkhawm ah hian Health Minister chuan State Research Unit on COVID-19 chu Mizoram-a COVID-19 hri len dan leh kan inkaidarh dan bakah thil pawimawh dang zawng zawng zir bing tura tih an ni, a ti a. Data felfai tak lakhawma kan dinhmun diktak zir a nih chuan hri kan inkaidarh dan chiang leh felfai zawkin a hriat theih ang a, Third Wave lo thleng tur an sawi atan pawh hian sawrkar leh mipuite pawhin a lo inven lawk dan turte pawh kan hriatchian phah thei dawn tih a sawi a, Hei bakah hian thil chi hrang hrang zirchian ngai a awm thu sawiin, COVID-19 hri kai enkawl damte leh nunna chante pawh an Medical history zirchian a nih chuan fimkhur dan tur leh inenkawl dan turte pawh kan thiam lehzual phah thei ang a, kan tangkaipui hle in a rinawm tih a sawi a. Khawvel hmun danga hri leng chanchin kan hriat rualin keimahni tualzawl-a kan dinhmun zirchian hian thil danglam bik emaw, hmun dang nen kan in anlohna te a awm anih phei chuan a pawimawh lehzual dawn tih a sawi bawk.

He hunah hian Chief Secretary Lalnunmawia Chuaungo pawhin First wave-ah kha chuan hri kai kan pun chak viau hian kar khat te kan in lockdown hnuah case hmuhchhuah a tlahniam thin tih sawiin, kan pun leh deuh chuan kan in lockdown leh thin a, hri inkaichhawnna (transmission chain) engemawchen kan chhut chah bakah hri inkaidarh chak tur kan pawh muan thin thu leh, hei hian Community Spread nasa tur pawh a veng thin nia an hriat thu a sawi a. Tun tuma kan boruak erawh thla khat chuang kan inkharkhip chung pawhin tlakhniam lam kan pan thei lo reng reng mai tih sawiin, heng te bakah thil dang chhan tha tak tak pawh a awm theih avang hian Data nen Scientific Evidence hmanga kan zirchian hian kan dinhmun diktak a hriat theih a rinawm tih a sawi bawk.

He hunah hian zirbingna tur peng hrang hrang sawiho a ni a, chung zingah chuan Second Wave-ah hian COVID-19 variant thar a awm tawh em? tih te, he hripui leng tharin mipuite kawng hrang hranga a nghawng dan te, mipuiin an dawnsawn dan te, sik leh sa thlenga a nghawng dan te bakah Positive hmuhchhuahte case study neih a he hrik hnathawh dan zirchian te, hri kai hmuhchhuah hma (early detection) dan tur te, ranvulhte hi hri pu darhtu (carrier) an ni thei em tih te telin data lakkhawm dan turte leh thil pawimawh chi hrang hrang sawiho a ni bawk.