Latest News

Hripui len chhunga zirna kalpui zel dan tur Education Minister hovin sawiho a ni

Hripui len chhunga zirna kalpui zel dan tur chungchang sawihona chu nimin khan School Education Minister, Lalchhandama Ralte hovin neih a ni a, rampum huapa khairual taka Online Class kalpui theihnan kaihhruaina siam tur Committee chu HRD Board Vice Chairman, L.Thangmawia kaihhruaina hnuaiah din a ni.

He sawihona hun Planning Department Conference Hall, Aizawl-ah neih kaihruaitu School Education Minister, Lalchhandama Ralte chuan hripui leng karah zirna kalpui zel a ngai tih sawiin, thawhhona tha tak nei zel turin zirna lama thawktute a sawm a, mahni thiam dan dana Online-a zirtirna kalpui theih chuan thlen chin a inang lo zung ang tih te pawh a hlauhawm a, chuvangin khairual taka kalpui theih dan zawn a tul a ni, a ti. Zirlaibu pawh semchhuah dan kawng ruahman a ni dawn tih sawiin Minister chuan, zirlai ten zirlaibu an hmuh thuai theih nan tanlak a ni dawn tih a sawi a. Hei bakah hian Mizoram-ah zirna tha a awm theih nan ruahmanna siam chhoh zel a tul thu leh, tuna kalphungah chuan Private Boarding School tha tak, ramdang nena khaikhin pawha zahpuiawm loh mi-in din duh se, kawng a awm meuh lo tih sawiin, mi in Service an pek theih dan zira Fees an lak theih dan tur pawh hi siam a ngai nia a hriat thu a sawi bawk.

He Meeting-ah hian rampum huapa khairual taka Online Class kalpui theih dan tur sawiho niin School hrang hrangten Online Class an kalpui dan a inchen lova, chuvangin khairual taka zirna kalpui a nih theih nan kaihhruaina siam tur Committee din nise an ti a. HRD Board Vice Chairman L.Thangmawia chu he Committee-ah hian Chairman a ni dawn a, June 2021 chhungin kaihhruaina hi an siam dawn a ni.

HRD Board Vice Chairman, L. Thang-mawia chuan nikum lama Online Class neih dan chu research neia an zirchian thu a sawi a. Online Class chu zirlaite tan khairual taka neih theih ni rih lo mahse, zirtirna pek dan kawng awmchhun a nih rih avangin mumal zawka neih dan ruahman a ngai nia a hriat thu a sawi a. Online Class-ah zirtirtu leh zirlaite pawhin training an neih a ngai hle nia a hriat thu a sawi bawk.

School kal theihloh chhunga Private School-ten Fees an lak dan chungchang pawh he hunah hian sawiho a ni bawk a, tun dinhmunah School thenkhat chuan harsatna an tawk nasa hle tih Mizoram Independent School Association hruaitute chuan an sawi a. Hemi chungchang hi sawiho a nih hnuah School Fees an lak mek atanga zaa 70 aia sang lak loh nise, a hniam thei anga Fees hi kalpui turin Meeting chuan School neitute pawh a ngen nghal a ni.

School Education Special Secretary, Dr. Lalzirmawia Chhangte chuan Ministry of Education Department of School Education & Literacy buatsaihin India ram Board hrang hrang leh Central Senior Minister-te nen May 23, 2021 khan Online Meeting neih a nih thu leh CBSE, ICSE leh State Board zawng zawng deuhthaw ten Board Exam an la buatsaih theih loh laiin Mizoram chuan har-satna awm lovin tluang takin buatsaih theih a nih thu leh result pawh chhuak thei tep a ni tih a sawi a. India ram hmundanga zirlai hrileng 2nd wave avanga Mizoram-a lo hawte tan Exam Centre thlak theihna kawng hawng tura ngenna Ministry-a an thlen thu pawh a sawi bawk.

Comments

Chhiar Hlawhte