Speaker in Social Media-a thuthar thehdarh chungchangah fimkhur ngai a tih thu a sawi

Mizoram Assembly Speaker, Lalrinliana Sailo chuan Social Media-ah thu belchian dawllo chhuah a nih thin thu sawiin, Social Media-a thu thehdarh chungchangah fimkhur ngai a tih a sawi a. MLA atana thlan thar Lalduhoma chu COVID-19 hripui dolet kawngah inkaihruaina (SOP) a lo chhuak avanga lakluh hun sawn a nih thu a sawi bawk.

Assembly Speaker Lalrinliana Sailo hian nimin-a Assembly Conference Hall, Assembly Annexe-a thuthar thehdarhtute a kawmna ah Social Media-a thu thehdarh chungchang hi sawiin Social Media-a thu thehdarh chungchangah fimkhur ngai a tih thu a sawi a, “Social Media hi kan hman tangkaina pawh a awm a, ka sawi duh chu Editor ni lo thusawi a ziktluak em tih hi Mizo mipuite hian ngaihtuah a va'n tha e,” tiin, “Social Media-a kan duh duh kan ziak phar lutuk te, insumkarna nei lek lo a kan kal ta hi! Hei hi a va pawi em,” a ti a. Social Media-a thu thehdarh chungchang sawiin, “Social Media-a active em em te hi an inchhungkhur an en hian inenkawlna fel tak nei hi an vang ve ngawt mai,” a ti a. “Chutiang chuan he ram hi an awpbet a ni thawthang tawh a, Fake Account hi zalen tak leh ngaihngam taka an len tamna a ni a,” a ti bawk.

Assembly Speaker hian Serchhip Assembly Constituency bye-election a thlantlin Lalduhoma chu Independent Candidate ni chunga Political Party pakhat, Zoram Peoples Movement (ZPM)-ah a tel avanga MLA a nihna atanga ban a ni tih sawiin, a bial-ah hian bye-election neih niin thlantlin leh a nih thu leh May 5, 2021 khan lakluh tura tih a nih zet hnuah a hun sawn a ni tih a sawi a. Hei hi COVID-19 hripui dolet kawngah inkaihruaina (SOP) thar a lo chhuah avanga sawn a nih thu a sawi bawk.

MLA atana lakluh leh tak Lalduhoma chu 'Dan a bawhchhia e,' tia MLA 12-in an hek avanga Dan anga disqualify a nih thu sawiin, Lalduhoma ngeihlohna avanga ban a nih loh thu a sawifiah a, hemi chungchangah hian Independent MLA dang VL. Zaithanzama chungchang pawh sawiin, ZPM-in Election Commission of India-ah registration an dilnaah Treasurer atan an lo tih thu leh mi thenkhat in hei hi ngaimawh an awm thu a sawi a, “Kan Legal Board te leh mi thenkhatin dan an kalh ani lo maw tiin Chief Minister zahawm tak hoin kan sawi pui a. Chief Minister chuan disqualify a tha lo e a ti,” tiin Disqualify tha an tih loh avangin VL. Zaithanzama chu ZPM Treasurer atana ruat a nih a pawm lohna lehkha thehlut turin tih a nih hnuah a thehluh avangin an ban ta lo niin a sawi bawk.