COVID-19 Vaccine dose 2-na pek hun tih danglam niin Dose 2-na pek tihtawp rih a ni

Ministry of Health and Family Welfare in Covishield vaccine dose hmasa ber lak atanga ni 28 hnuah dose hnihna lak theih tura a tih thin tihdanglam a nih vangin Vaccine Dose hnihna pek mek tihtawp lailawk a ni a, kum 18 leh 45 inkar te tana Vaccine pek tur pawh a rawn thlen thuai beisei a ni.

Sawrkar laipui chuan tunkar Nilaini khan COVID-19 vaccine pek dan ruahmanna siam tharin hei vang hian State hrang hrang pawhin harsatna an tawk a, Mizoram-ah pawh niminpiah-a Dose khatna la tawh tana Dose hnihna la thei tura an puanzar lawk tawh anga kalpui thei lovin hri danna lakna hmuna kal mi tam zawk chu vaccine la lovin an haw leh a ni. Hemi chungchangah hian State Immunization Officer, Dr. Lalzawmi chuan, “Health Ministry lamin dose khatna lak atanga ni 28 ral hnu tih thin kha, ni 42 ral hnuah dose hnihna a lak theih chauh an rawn ti thut si a, COWIN Portal-ah hman thar anih avangin mi tam tak, upa deuh zawk te pawh vaccine dose hnihna la tura lo kal te kan pe thei lo a, mipui hriatthiamna ka han dil e,” a ti a, Vaccine awmloh vang a nih loh thu leh hri danna pek tawh loh tur tihna pawh a nih loh thu a sawi bawk.

Dr. Lalzawmi chuan Second dose pechhuak tura an inruahman dan angin engkim an kalpui thu leh Vaccine pawh a pe turte hnenah an pekchhuah hman thu sawiin, “Mahse, COWIN Portal kan hriatchian meuh chuan dose khatna lak atanga ni 42 a tlin phawt loh chuan Second dose a lak theih loh an rawn tibur leh si a. Keini chauh ni lo State dangte pawh an buai phah khawp mai,” a ti bawk.

Ministry of Health and Family Welfare in thutlukna thar a siamah chuan, Covishield Vaccine dose khatna lak atanga ni 28 ral hnuah Dose hnihna lak theih ni thin kha, tunah chuan ni 42-56 inkarah tih a ni tawh a, ni 56 pel lo se tih a ni bawk. Hetihlai hian, a hmaa dose khatna lak atanga ni 28 ral hnua dose hnihna la tawh tan buaina engmah a awm lo niin a sawi a. Dr. Lalzawmi chuan, “Kum 45 chunglam tan dose khatna la tawh hian ni 42 an la tlin loh fur hlawm dawn avangin kan la nghah leh diah diah a ngai dawn a ni,” a ti a, kum 45 chunglam tan dose khatna an la pek chhunzawm zel thu a sawi bawk.

Hetihlai hian, kum 18-44 Group te vaccine pek tur chu a hran hlak a nih avangin tuna an pek lai nen pek pawlh remtih a ni lo a. An vaccine tur chu State sawrkarin a siamtute hnen atangin lei a ngai tih a sawi a, sawrkar in lei a phalsak zat tlem chu lei a ni tawh a, an rawn thawn thleng tep tawh tih a sawi bawk.