Latest News

Serchhip bial Assembly bye-election ah hneh takin Lalduhoma thlantlin a ni

April 17, 2021-a Serchhip Bial Assembly Bye-Election a Vote tla te chu nimin, May 2, 2021 khan chhiar a ni ta a, MLA aTanga ban tak leh ZPM Candidate Lalduhoma chu hneh taka thlantlin niin Lalduhoma hian amah hnaih bertu rorellai MNF Candidate, Vanlalzawma chu Vote 2950 zetin a hneh a ni.


Kum 2018 Mizoram Legislative Assembly inthlanpui neih-a 26-Serchhip (ST) AC bialtu MLA atana thlantlin, Lalduhoma chu Anti-Defection Law bawhchhia a puh a nihna avanga Mizoram Legislative Assembly Speaker in MLA a nihna atanga a ban hnuah April 17, 2021 khan Serchhip Bial Assembly bye-election hi neiin mipui ten Vote an thlak a, he inthlanna a Vote tla te hi nimin, May 2, 2021 zing dar 8:00 atang khan Serchhip DC Office-a Counting Centre-ah chhiar niin ZPM Candidate Lalduhoma hian Vote 8269 hmuin thlantlin a ni a, amah hnaih bertu MNF candidate, Vanlalzawma chuan Vote 5319 a hmu a, MNF Candidate in Lalduhoma Vote hmuh a phaklohna hi Vote 2950 zet a ni a, kum 2018 MLA inthlanpui-a a vote hmuh (5481) aiin Vote 2,788 in a hmu tam zawk bawk a ni.

He inthlanna ah hian Indian National Congress (INC) Candidate, PC. Laltlansanga chuan Vote 2604 hmuin Bharatia Janata Party (BJP) Candidate, Lalhriatrenga Chhangte chuan Vote 250 a hmu a. MPC Candidate Vanlalruata chuan Vote 38 hmuin Independent Candidate, Ramhlun-Edena chuan Vote 43 a hmu a, NOTA-ah Vote 32 a tlak bakah Rejected Vote 40 a awm bawk.

Serchhip Bial chhunga Polling Station 29 awm-ah hian Vote nei 19,520 awmin Service Voters 198 a awm bawk a, nimin-a Vote chhiar-ah hian Vote tla zawng zawng hi 16,595 niin Vote tla zawng zawng hi 84.16% a ni a, Serchhip bialtu MLA atana thlantlin tak ZPM Candidate Lalduhoma hian Polling Station 26 ah Vote hmu sang ber nihna hauhin MNF Candidate, Vanlal-zawma chuan Polling Station 2 (Buangpui leh Neihloh) leh INC Candidate, PC. Laltlansanga chuan Polling Station pakhat (Serchhip-VIII/Serchhip Hmar Veng)-ah Vote hmu sang ber nihna an hauh bawk a, Candidate dang ten Vote hmu sang ber nihna an neilo a ni.

Serchhip bialtu MLA atana thlantlin tak, Lalduhoma hi nimin vek khan Returning Officer, Kumar Abhishek chuan thlantlin a nihna Certificate a hlan nghal a ni.

Comments

Chhiar Hlawhte