Latest News

Serchhip-ah Inkhuahkhirhna Dan khauh takin lekkawh tur a ni - Bawrhsap

Serchhip District Task Force Committee on COVID-19 chuan nimin khan Serchhip khawpui chhunga hri leng avanga Executive Duty te tlawhkualin he hunah hian District Bawrhsap leh an Chairman, Kumar Abhishek chuan COVID-19 hri leng avanga inkhuahkhirhna Dan chu khauh takin Serchhip-ah lekkawh tur a nih thu a sawi.

Serchhip District Task Force Committee on COVID-19 ten Executive Duty an tlawhna ah hian Team No. 1 te chuan Bawrhsap kaihhruaina in Chhiahtlang atanga Serchhip Kawnpui inkara Executive Duty te an tlawh a, heng duty an tlawhnaah te hian Bawrhsap chuan hripui laka mipuite venghimtu ni turin mawhphurhna pawimawh tak an chelh tih sawiin, “Mipuite himna leh khawtlang him kan neih theih nana thawktu in ni a, in inthlahdah tuartu chu mipui zawng zawngte kan ni dawn a ni. Chuvang chuan Executive Duty te tumah an inthlahdah tur a ni lo,” tiin an Duty Post a thu ringawt lovin an huamchhungah an kal kualin inkhuahkhirhna dan bawhchhiate an manin an chawi tir ngei tur a ni tih a sawi a. Mipuite him nan leh Serchhip khawpui chu hripui laka hmun him zawka kan siam theih nan inkhuahkhirhna dan dinglai te khauh taka kenkawh tura chahin, mihring leh lirthei chevel te pawh endik lova tumah kal liam tir ngawt lo turin a chah a, anmahni himna ngai pawimawha fimkhur reng turin a hrilh bawk. VLTF Duty te pawh khauh zawka kal tura ngenin chhuah phalna dilte dilna pawh uluk taka ngaihtuaha, a zawng a zaa phalna pe mai thin lo turin a chah a ni. 

Team No. 2 te chuan an Leader Addl. DC, Lalmuansanga Ralte hovin P&E Veng, Chanmari, Field Veng leh Vengchung-a Executive duty te an tlawh a, khauh zawka inkhuahkhirhna dan kalpui tura chahin kan dinhmun thatloh zia hre chunga taima taka an hnate thawh a tul zia an hrilh a. Team No. 3 te pawh an Leader, Stephen Lalrinawma, SP kaihhruaiin Darnam, Dinthar, Chhim Veng leh Hmar Veng te an fang kual a, anni pawhin Executive duty te chu inkhuahkhirhna dan khauh taka lekkawh a tul zia an hrilh bawk.

Nimin-a District Task Force Team vak chhuakte hian tuallai-a dan phal lohva tei chhuak te an dap nghal bawk a, District Task Force Team ten an tlawh kual laia Duty tura ruat, an duty na hmuna awmlote hi insawifiah tura koh (explanation call) an ni dawn a ni.

Comments

Chhiar Hlawhte