Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

BJP Candidate in amah Vote tu te chungah lawmthu sawiin, a phur phah hle tih a sawi

Serchhip bial Assembly bye-election neih zawh taka BJP Candidate, Lalhriatrenga Chhangte chuan BJP an nih avanga thinhrik chuang lova Vote tu te chungah lawmthu sawiin, amah duhsaktu an awm chu chona nasa takah ngaiin a phur phah hle tih a sawi.

Assembly bye-election neih zawh taka BJP Candidate, Lalhriatrenga Chhangte hian nimin chhun khan Serchhip Press Club-ah thuthar thehdarhtute kawmin Assembly bye-election neih zawh tak chu a Special em em tih sawiin, “Pu Duha versus MNF sawrkar anih tawp avangin issue dang emaw, Candidate dang te tan han inrawlh a, han chet ve chiam theihna boruak a awm ta ngang lo kha a ni ber,” a ti a. Hei vang hian amah tha ti ve tu leh MLA atana duhtu te pawhin an vote duh tak hrih lohna thinlung te pawh a hriatthiam thu a sawi a. BJP a nihna thinhrik chuang lova duhsaka khawngaih vote tu mi 250 Serchhip bial-a an lo awm chu chona nasa takah ngaiin a phur phah hle tih sawiin, Serchhip bialtu MLA nih tum avanga Serchhip bial hmangaih thar a nih loh thu a sawi a, “Tih leh hunah uluk leh Planning fel zawk neiin kan la rawn thawkchhuak leh ngei anga, thawhona tha zawk kan nei ngei tawh ang tih hi ka ring tlat a ni,” a ti bawk.

Lalhriatrenga Chhangte chuan Mizoram-a MNF sawrkar hnenah Serchhip bial mipui ten thuchah tha tak an thawn nia a hriat thu pawh sawiin, he inthlanna neih zawh tak hian sawrkar-ah “Keini Serchhip bial mipuite chuan in ban duhna thinlung leh in hmalak dan hi kan pawmpui ve hauh lo che u a. Chuvangin MNF sawrkar hian Pu Duha kan han chhanlet ve leh ngat avang hian Mizoram sawrkar hmalakna kawng hrang hrangah engtiang pawha fahran taka enkawl nih pawh kan huam e. Thil dik nazawng hi tih pup pup kher a ngailo, inhriatthiam/inngaihdam te pawh hi a Mizo Kristian ngawih ngawih chang a awm ve bawk asin,” tia thu an chah nia a hriat thu a sawi.

Tun sawrkar term kallai, kum 2 leh a chanve chho chu Serchhip bial-in Mizoram sawrkara Opposition MLA leh theih ang anga Serchhip bial mipuite kan tisa, rilru leh thlarau lam thlenga hmasawnna lo tuipui over chho hle zeltu tur, Central sawrkar Ruling mi leh sa kan nei kawp dawn nia a hriat thu pawh a sawi bawk.

Thuthar thehdarhtute zawhna chhangin Lalhriatrenga Chhangte chuan BJP zawm mah se RSS an zawm ve lo tih a sawi a, “BJP takin a Mizo theih a, BJP takin a Kristian theih a ni,” tiin inthlanna neih dawna a thusawi, thlantlin a nih hnua hmalakna tura an hmachhawp thenkhat te chu hmalak zui zel a tum dawn thu leh Delhi lama BJP hotute hmu tura zinthlak thuai a tum thu a sawi bawk.

Comments

Chhiar Hlawhte