Raw chi Supply tura Tender chhuah sut leh phut

Mizoram Pradesh Congress Committee (MPCC) chuan Mizoram sawrkar in Rawmi Chi supply tura Tender a chhuah chu sut (cancel) ngei turin sawrkar an ngen.

Nimin khan MPCC Vice President, Lalsawta chuan thuthar thehdarhtute kawmin Mizoram sawrkar chuan May 7, 2021 khan Rawmi Chi (Dendrocalamus Sikkimensis seedlings) supply turin Tender Notice a chhuah tih sawiin, “A hriate sawi danin he Rawmi hi Zobawm ngaw thing lian pui kara awm chi niin a chin hi thlai leh thing dangte aia harsa tak a ni a. Kan ngaw neih ang ang, Mizoram hmun hrang hrangah hian lo ching hlawhtling tehreng pawh ni ila, a lakkhawm (harvesting) hi thil harsa tak tur a ni tih pawh a chiangsa reng bawk a ni,” a ti.

MPCC Vice President chuan COVID-19 hripuiin nasa taka min nuai lai, mi thenkhat tlawmngai te'n an theih ang ang thawhkhawm-a he hripui do-a kan beih mek laia, sawrkar sum heti zawnga lo hman tum chu mipui pawh an zahawm hle tih sawiin, “State hausa zawk, Chhatisgarh te pawhin COVID-19 len hma daiha New Raipur-a Governor leh CM bungalow, Legislative Assembly Complex leh Officer rual luah tur tam tak sak tuma Tender an chhuah tawh pawh hripui vangin an sut (cancel) vek tihte kan lo hre ve a, Central sawrkarin Central Vista, cheng vbc. 20,000 senna tur an ruahman pawh mipuiin a hun lova ngaiin an sawisel nasa hle a ni,” a ti a. Chuvangin sawrkarin Rawmi Chi supply tura Tender a chhuah chu sut (cancel) ngei turin MPCC chuan sawrkar a ngen tih a sawi bawk.