Latest News

Pathianni-ah hri kai hmuhchhuah an tam

Pathianni khan Mizoram-ah Sample 599 enfiah niin heng atang hian COVID-19 hri kai 150 hmuhchhuah an ni a, Sample enfiah atanga za zela 25.04 te chuan hri an kai ang a ni.

Pathianni khan ZMC Laboratory ah Sample enfiah awm lovin District hrang hranga TrueNat Laboratory-ah Sample 85 enfiah niin hri kai mi 6 hmuh an ni a, heng zinga mi 4 te chu Siaha District ami niin tunhnaia State pawn atanga rawn haw vek an ni a, Saitual District-ah hri kai pahnih hmuh niin pakhat hi State pawn atanga rawn haw niin midang pakhat hi hri kai nen inkawmhnaihna nei an ni thung.

Pathianni khan Mizoram-ah Rapid Antigen Test hmangin Sample 514 enfiah niin hri kai mi 142 hmuhchhuah an ni leh bawk a, an zinga mi 110 te chu Aizawl District mi an ni. Tunhnaia hri kai hmuhchhuah tamna Aizawl Chhinga Veng-ah hri kai mi 16 zet hmuh leh an ni a, Ramthar Veng ah mi 11 leh Tuithiang Veng-ah hri kai mi 10 hmuh an ni bawk. Heng bakah hian Kolasib District-ah hri kai mi 13 hmuh niin an zinga 8 te chu Mizoram-a rawn luh tum an ni a, Lunglei District-ah hri kai mi 7 hmuh an nih bakah Saitual District-ah mi 6, Serchhip District-ah mi 4 leh Siaha District-ah hri kai mi 2 hmuh an ni bawk.

Nimin khan Mizoram-a COVID-19 hri kai mi 245 te chu enkawl dam leh niin hei hi Mizoram-a ni khat-a hri kai enkawl dam an tam ber ni a ni a, an zinga a tam ber mi 163 te chu Aizawl District mi an ni. Heti hian nimin tlai dar 5:00 thlenga Mizoram-a hri kai hmuhchhuah chu 8829 niin an zinga 6932 te chu enkawl dam ni tawhin hei hi hri kai hmuh atanga chhutin za zela 78.51 a ni a, tunah hian hri kai enkawllai 1871 an la awm mek bawk a ni.

Ni khat-ah hri kai nunna chan mi 3 awm :

Mizoram-a COVID-19 hri kai hmuhchhuah zingah nimin khan nunna chan mi pathum awmin Mizoram-a COVID-19 hri kai zingah nunna chan mi 27 an awm tawh a ni. Nimin-a hri kai zinga nunna chan mi 3 zinga pahnih hi niminpiah a hri kai hmuhchhuah niin nimin zing dar 2:30 vel khan Mangdin (61), Chhinga Veng Aizawl chu COVID-19 Pneumonia vangin ZMC-ah a boral a, amah hi BP sang, Zunthlum leh natna benvawn dang nei a ni. Nimin zing dar 1:30 vel khan Zathangpuii (74), Thingdawl, Kolasib District chu COVID-19 hri a kai tih hmuhchhuah a nih hnuah a boral ve bawk a, Zathangpuii hi niminpiah khan RAgT hmangin a pasal nen COVID-19 hri a kai tih hmuhchhuah a ni a, ZMC panpui a nih laiin Zanlawn daiah a boral a ni. Nimin a nunna chan pakhat hi Chhuanawma (55), Chanmari West Aizawl niin April 17-a hri kai hmuhchhuah a ni a, Chuap TB leh Lung thalo nei a ni bawk.

Comments

Chhiar Hlawhte