Chanchin thar thenkhat :

Pisa tam tak rawktu man

Thla sarih (7) chhunga Champhai-a sawrkar Pisa hrang hrang tum 10 lai rawktu a puh James Vanlalthlana (42), Jacob Vanlalbika tia insawi thin, tuna Khawmai (Myanmar)-a cheng nia insawi chu nimin zing dar 2:30 vel khan Champhai Police ten an man. Thudawn danin James Vanlal-thlana hian nizan hmasa khan Champhai-a DAO Office rawkin Iron Chest a rukchhuah Myanmar Bike hmanga a phur chu New Champhai-ah Police ten an lo man a, Iron Chest a lakchhuah ah hian Rs. 4,64,950/- a awm a, a vai hian hmuhlet nghal a ni. James Vanlalthlana hian nikum Oct. 19 khan Champhai DAO Office rawk tawhin hemi atanga an man thleng hian Pisa hrang hrang ah tum 10 che tawhin cheng nuai 14 chuang hu a ru hman nia hriat a ni. James Vanlalthlana hian nizan hmasa khan Khawmawi atang hian Champhai hi a pan nia hriat a ni a, amah hi tunhma deuha Serchhip-a Pisa hrang hrang rawk chungchang ah pawh lo man tawh kha nia hriat a ni.

Minister in sum thawh

Chief Minister Zoramthanga, Deputy Chief Minister Tawnluia leh Assembly Speaker, Lal-rinliana Sailo bakah Minister 10, Deputy Speaker leh MLA 16 te chuan COVID-19 hrileng mek laka mipui an him theih nan leh a tul apianga hman turin nimin khan an hlawh atangin Rs. 15,000/- theuh Chief Minister's Relief Fund for COVID-19 ah an thawh a, a vaiin Rs. 4,50,000/- niin nimin vek khan United Pentecostal Church of Mizo-ram in Rs. 8,00,000/- leh Ramhlun Venglai Presbyterian Kohhran in Rs.1,00,000/- an thawh bawk.

Vaccine pek hna kalpui

Kum 18 leh 44 inkara ngaih pawimawh zual te hri danna pek hna chu nimin khan Mizoram-ah kalpui tan a ni a, State Immunization Officer Dr. Lalzawmi chuan Mizoram chhunga District pathum Siaha, Serchhip leh Kolasib tihloh ah chuan vaccine hi pek vek anih thu a sawi a ni. Kum 18 - 44 inkarte vaccine pek tur bik hi sawrkar laipuiin a thlawnin dose 16,340 a rawn pe a ni.

Ramkang chungchang sawiho

Tunhnaia Mizoram hmun hrang hranga kangmei chhuak chhuichiang tur leh hemi kaihhnawiha dan dinglai awm mek te zirchiang a, a tul anga hmalak dan tur rawtna siam tura Mizoram sawrkarin a ruat, State Level Special Investigation Team on Fire Outbreak chu nimin khan Lunglei District thuneitute nen inkawmin an District-a kumin a ramkang dinhmun an sawiho a, kumin hian Lung-lei District-a VC 32 huamchhungah ramkang hi awmin ram hectare 2061 vela zau a kang nia chhut a ni.