NH. 6 laih tur chungchang DC in khaw 2 te sawipui

Khawzawl District Bawrhsap, Zothanmawia chuan niminpiah khan Kawlkulh leh Dulte khua te tlawhin National Highway No. 6 kawng laih dan tur duh lova heng khaw pahnih ten lungawilohna an lantir mek chungchangah khawtlang hruaitute a kawm.

Heng khaw pahnih khawtlang hruaitute a kawmna ah hian Khawzawl DC chuan National Highway No. 6 kawng laih dan tur Central lamin an tihfel tawh avangin tunah chuan engmah tihdanglam theih a awm tawh lo tih sawiin, khaw pahnih khawtlang hruaitute chuan theihtawp chhuahin an duhdante an tilang tawh a, tunah hian tihdanglam theih a awm tawh loh avangin an dinhmun pawm thiam a, harsatna thlen thei zawnga hma la lo turin a ngen a. Thawm neih leh thuchhuah siamte pawhin awmzia a nei tawh lo tih sawiin, tunah hian ngen tur a awm tawh lova, awmze nei lova boruak tih sosan a hlauh-awm thu a sawi a. Kawng hi Central Sawrkar sum hmanga thawh tur a ni a, a laih dan tur pawh Central Sawrkar buaipui a ni a, kawng laih tur tha taka tawiawm chu khua leh tui kan nihna anga kan mawhphurhna a ni, a ti bawk.

He hunah hian Khawzawl SP, PC. Lalchunglura pawhin lungawilohna lantir mekah dan bawhchhiatna a thlen theih dan leh dan bawhchhiatna in nghawng pawi tak a neih theih dante a sawifiah a. Additional DC Lalrohlua chuan khawtlang hruaitute hnenah Land Acquisition chungchanga hriattur pawimawhte a hrilhfiah bawk a ni.