ZMC-a hman turin Ruang phurhna Motor hlan

State Bank of India, Mizoram Staff ten Zoram Medical College (ZMC)-a hman tur COVID-19 hri kai boralte ruang phurhna tur, Morgue Van an lei chu nimin khan Health Minister, Dr. R. Lalthangliana hnenah an hlan.

He motor inhlanna hun hi nimin khan Mizoram Secretariat tualzawl-ah neih niin State Bank of India Regional Manager, LP. Lalchangkima chuan Health Minister hnenah hian a hlan a, Health Minister chuan Mizorama State Bank of India hnuaia thawkte mai bakah Bengaluru (Bangalore)-a Mizo SBI Officer ten an pawisa thawhkhawma Mizoram-a COVID-19 hri kai nunna chante ruang phurhna tur, Morgue Van an lei chu ropui a tih thu leh ram leh hnam hmangaihna thinlung atanga chhuak a nih ngei a rin thu a sawi a. ‘Mizoram tan’ tia thawhlawm an thawhkhawm chuan a rilru a hneh thu leh Zoram mipuite rilru pawh a hneh ngei a rin thu a sawi bawk.

Health Minister chuan ZMC-a Oxygen siamchhuahna khawl, Oxygen Generating Plant chhia siamtha tura a siamtu company, HOSCO Pvt. Ltd. Kolkata ami te nikum lam atanga an chah tawh, COVID-19 hrileng chhuanlama rei tak lo kal theilo te chu na deuh hleka a nawr thu sawiin, tunkar tir khan a siamthatu tur Engineer-te an rawn thlen thu leh an siamthat tawh thu a sawi a, nimin chawhma lam khan enchhinna (trial run) hlawhtling taka neih a nih thu a sawi bawk. Hei bakah hian Dr. Thangtea chuan Mizoram-ah hetiang siam thiam kan neih loh avangin nakin-a mamawhna kan neih hunah kan buai loh nan Mizorama hetiang lam kawnga hriatna nei tur deuh nia an hriat Technician te sawmin, HOSCO Pvt. Ltd. Engineerte chu kan mite training pe tura cham chhunzawm tura a ngen angin training an pek dawn thu a sawi bawk.

SBI Regional Manager, LP. Lalchangkima chuan Corporate Social Responsibility hnuaia tih dawn chuan file kalkual hunte a rei thin avangin Mizoram-a SBI staff-te chuan anmahni pawisa thawhkhawma Morgue Van hi lei mai a tha an tih thu leh Bengaluru (Bangalore) a Mizo SBI Officer te pawhin ‘Mizoram tan’ ti-a an rawn thawh ve thu a sawi a. “Mizoram in COVID-19 hripui a dona kawnga kan tangkai ve theihna a nih beiseiin hetiang hian hma kan la a ni,” a ti bawk.