Latest News

NE States Road Investment Programme Scheme hnuaia Serchhip to Buarpui ADB Road zawhfel a ni ta

Serchhip leh Buarpui inkar kawng, Asian Development Bank (ADB) sum hmanga laihzauh leh siamthat hna thawh chu zawhfel a ni ta.


Serchhip leh Buarpui inkar kawngpui siamthat tak hi Asian Developmen Bank loan hmanga NE States Road Investment Programme Scheme hmanga thawh a ni a, KM 55-a thui niin he hna hi hlawm hnih ah then a ni a, a hna pakhat hi Serchhip atanga intanin Chalkhan Kawn thleng niin hei hi KM 15.2 a thui a ni a, pakhat hi Thenzawl atanga intanin Buarpui thleng a ni ve leh thung a, hei hi KM 39.8 a thui a ni thung a, kawng siam hna hi Tantia Construction Ltd. chuan thawkin kawng laihzauh leh Blacktop hna an zawhfel a nih hnuah Serchhip leh Thenzawl inkar-a Mat Lei siam hna chu thawh chhunzawm reng niin he hna pawh hi zawhfel ni tawhin tunah chuan he Project hi zawhfel a ni ta a ni. He Project hnuaiah hian Lei pahnih dawh niin Mat Lei dawh zawh a nih hma hian Thenzawl leh Buarpui inkar-a Tlawng Lei chu dawh zawh a lo ni tawh bawk a ni.

He hnathawh viltu Project Director, H. Zoramliana chuan he hna hi kum 2014 December thla atang khan thawh tan a nih thu sawiin, Project pumpui chu cheng vbc. 301.97 a nih thu a sawi a, hemi atang hian Civil Works bik chu cheng vbc. 231 a nih thu a sawi a. Mat Lei dawh hna hi an zawhfel hnuah hri leng avanga a hawnna neih theih ala nih loh avangin nimin khan Lei hi mipui zawh theih tura hawn a nih thu leh Official-a hawn erawh chu sawrkar hotute ruahmanna angin hri leng reh hun lamah neih ala nih tur thu a sawi bawk. Project Director chuan he Project hna an thawh chhung hian mipuite leh khawtlang hruaitute tawiawmna tha tak an dawng tih sawiin, tluang taka an zo thei chu lawmawm a tih thu a sawi bawk.

Comments

Chhiar Hlawhte