Chanchin thar thenkhat :

Edn. Minister in tlawhkual

School Education Minister leh Tuivawl bialtu MLA ni bawk, Lalchhandama Ralte chuan nimin khan a bial chhung khaw hrang hranga VLTF duty te kan kualin Darlawn, Sakawrdai leh Ratu a Damdawi In te a tlawh bawk a. He hunah hian bialtu MLA chuan an bial chhung mipuite chu COVID-19 hrileng laka an him theih nan sawrkar in inkaihhruaina a siamte uluk taka zawm turin a chah a, tuna kan fimkhurna hian kan ram leh khawtlang, kan chhungkua in harsatna nasa zawk a tawn tur min pumpelh tir thei a ni, a ti. Nimin a bial chhunga damdawi In a tlawhna ah hian Lalchhandama Ralte hian tanpuina sumfai, damdawi leh hmanrua hlanin VLTF te hi sumfai leh damdawi te a hlan bawk a ni.

Online-a bill pekna tlangzarh

PHE Department Lunglei WATSAN Circle hnuaia Lunglei khawpui chhunga mite tana online-a tui man (water bill) pek theihna tur chu nimin khan Lunglei District Bawrhsap, Kulo-thungan A chuan Lunglei DC Conference Hall ah a tlangzarh a, Tui man hi online payment portal (www.phedmizoram.in/billpayment.php) ah emaw, Paytm, PhonePe, GPay, Amazon Shopping apps hmang te'n emaw pek theih a ni. Online-a tui man pek dawn chuan consumer account number (tui bill-a inziak thin) nen thlunzawm hmasak a ngai a,www.phedmizoram.in/billpayment.php atanga pek hian convenience fee tlem te chawi belh ngai awmin, apps dang atang chuan chawi belh ngai a awm lo thung.

Inziahluhna tur buatsaih

India ram chhungah COVID-19 2nd Wave in nasa taka min nghawng leh tak avangin State hrang hranga Mizoram mi leh sa thalai hnathawk, he hrileng avanga Mizoram-a lo hawte chhin-chhiah leh mimal taka hriatchian a nih theih nan Mizoram Youth Commission (MYC) chuan an in report-na tur Google Form a siam a, https://forms.gle/CoRYevyiyA6D1RTr9 ah inziahluh theih a ni ang.

Catholic Kohhran tawngtai

India rama Catholic Kohhran Bishop te intel-khawmna, Catholic Bishop Conference of India (CBCI) in an rel angin nizan khan India rampum ah Catholic kohhran mipuite chuan mahni awm-hmun theuh ah tawngtaina hun an hmang a, he hunah hian COVID-19 hri leng mek avanga damlo te an dam theih nan leh hri leng avanga harsatna tawk ten thlamuanna an neih theih nan te, hri leng dona kawnga thawk zawng zawng ten chakna an neih zel theih nan te, hri leng mek a lo reh theih nan leh khuarel chhiatna hrang hrang laka kan him theihna tur te dilin, Myanmar-ah tualchhung buaina a lo reh-a mipui zalenna tura sawrkar tha a awm theih nan te pawh an dil bawk a ni.

Media te hri dona a hma hruaitu zingah telh phut

ZPM Thalaite chuan thuthar thehdarhtute chu hri leng dona kawnga a hma hruaitu (Front-liners) anga pawma hamthatna awm ang ang pek ve an phut thu an sawi. Nimin-a thuchhuah an siamah ZPM Thalaite chuan Zoram mipuite chan-chinthar leh hriat tur pawimawh min chhawp chhuahsaktu, kan chanchinbu mite leh media lama thawk ten hripui lêng karah pawh an hna thulh lova mipui rawngbawl hna huai taka an thawk chu ropui an tih thu sawiin, chanchinthar thehdarhna kawnga thawktute chu Covid dona kawnga a hma hruaitu, Frontliners anga pawm a, hamthatna awm thei ang ang te pawh pe ve zel turin Mizoram sawrkar an ngen thu leh an phut thu an sawi a ni.

Hei bakah hian ZPM Thalaite chuan COVID-19 hripui dona kawnga hma tawngtu, Health Care Worker-te, Police te, Disaster Management lama thawktute, Village leh Local Level Task Force te inpekna leh hnathawh mêk te chu ropui an tih thu leh an chhuan thu an thuchhuah ah hian an tarlang bawk.

A hunah result tihchhuah tum

Mizoram Board of School Education (MBSE) chuan COVID-19 leng mek karah an tum lawk angin June thla ah pawl 10 leh 12 result puan theih ngei an tum. MBSE Chairman, JH. Zoremthanga chuan COVID-19 hluar thar leh mah se an hun bituk lawkah HSLC leh HSSLC result puan theih ngei an tum tih sawiin, result endiktu zingah COVID-19 vei an la awm loh rualin thenkhat chuan an chhungte leh midang vanga Home Quarantine ngaite an awm a, chu chuan hna a ti muang deuh a, hun bitukah result puan ngei tum mah se, hma hun erawh sawi lawk theih a ni lo tih a sawi a. Tun dinhmunah chuan an programme duan lawk ang chuan an la kal zel thei rih tih a sawi bawk.