Latest News

Serchhip District-ah hri kai 366 hmuh an ni tawh

Serchhip District-a hri kai hmuhchhuah chu 366 an tling tawh a, nimin khan hri kai mi 57 enkawl dam an ni.

Niminpiah khan Serchhip-a TrueNat Laboratory-a Sample enfiah 20 niin heng atang hian COVID-19 hri kai mi 5 hmuh an ni a, hri kai hmuhchhuah te hi Horticulture College, Thenzawl-a thawk tura tunhnai a State pawn atanga rawn lut an ni a, an vai hian mipa vek niin inkhunghranna hmuna awmlai vek an ni. Nimin lama report hmanloh ah nizan hmasa khan Rapid Antigen Test hmangin Serchhip-ah hri kai mi 2 hmuh an ni bawk a, pakhat hi tun-hnaia State pawn atanga rawn haw niin pakhat hi hri kai hmuh tawh nen inkawmhnaihna nei an ni bawk.

Nimin khan Serchhip-ah Rapid Antigen Test hmangin Sample 40 enfiah a ni a, True-Nat Laboratory-a enfiah turin Sample 17 lak ni bawkin an result erawh kan hre hman lo thung.

Serchhip District-a COVID-19 hri kai enkawllai mi 57 te chu nimin khan Nursing School CCC atanga chhuahtir an ni ve leh a, heng hri kai enkawl dam tak te hi tunhnaia State pawn lama inthlanna a Duty a kal, PTS, Then-zawl an rawn thlen hnua hri kai hmuhchhuah te an ni. Hetihlai hian nimin khan Serchhip District-a COVID-19 hri kai enkawllai mi 4 te chu ZMC lama enkawl tura thawn an ni bawk.

Heti hian nimin thleng khan Serchhip District-a COVID-19 hri kai hmuhchhuah chu mi 366 an ni tawh a, an zinga mi 257 te chu enkawl dam ni tawhin hri kai enkawllai mi 108 an la awm a, hri kai hmuhchhuah ah nunna chan mi pakhat a awm tawh bawk a ni. Serchhip District atanga hri kai hmuhchhuah enkawllai te hi Nursing School, CCC-ah mi 32, Integrated Ayush Hospital, Thenzawl-ah mi 9, Horticulture College, Thenzawl-ah mi 21, PTS Digital Class Room-ah mi 32 leh ZMC-ah mi 4 bakah Home Isolation mi 10 te an ni.

Comments

Popular News (Last 30 Days)